E talenia le Uarota a Greenvale i Melepone

O se tasi o matafaioi e faaolaola ai autalavou ma matagaluega eseese a le tele o Ekalesia, o le faatino lea o faaaliga taleni ina ia tofu sao uma e faaali le meaalofa a le tagata ia ma faalauiloa, ina ia lē gata e maualuga ai le viiga o le Atua, ae ia silafia ai foi e le mamalu lautele le valaauina.
E lē gata foi i lea, o le faatumauina o le nofo feavatai ma le fealofani i le galuega a le Atua. O le tulaga foi lea na tino mai i le po o le Aso Faraile o le vaiaso na tea nei, i le faaaliga taleni a le Uarota a Greenvale o le Ekalesia a le Au Paia o Aso e Gata Ai i le aai o Melepone, ona e lē gata ina maualuga ai le viiga o le Tapaau o i le lagi, ae o le fealofaniga ma le feoeoeai faatasi o ona tagata.
O le Fofoga na faatautaia le po o le susuga ia Tassie Metusela, o le DJ na nafa ma le musika mo faafiafiaga o Tony Naea.
Na maitauina le felanulanuai o meaalofa ma taleni eseese o loo faataleniina ai le Uarota, e lē gata o le tupulaga talavou ma a latou taleni, ae o faafiafiaga faaatumotu ma le tele lava o taleni mananaia na molimauina.
Na faaalia le faagaeetia ma le agaga fiafia o le susuga ia Bishop Matuauta i le tulaga o le po ona o lona tautiga na tapena ma tau tuufaatasia ai le polokalama.
Na faaiuina i le malu o le afiafi ma le taumafataga māmā ma ta‘ape ai le fili alii ma le faamanū ma le viiga o le Atua.