O siaki e oo atu i le ta‘i $30,000 ua molimauina le agai i nisi o fomai i totonu o le atunuu i masina taitasi. O le faamatalaga ua oo mai o totogi nei o tautua o loo faatautaia e fomai tutoatasi (private doctors) o loo faafaigaluega e le Malo auā le faatinoga o nisi o tautua mo le Matagaluega o le Soifua Maloloina.
O masina taitasi e pei ona silafia ua ofo mai ai le taimi o nisi o fomai ua faatino lava a latou pisinisi poo falemai i le atunuu. Mo le vaiaso atoa i totonu o masina taitasi nei, e tapuni ai ofisa o fomai ia ae galulue i falemai i le atunuu. O le totogi la lenei o le auaunaga ua faia mo le Malo, e oo atu i le $30,000 i le masina.
Ua manino e lē taugofie le totogi e tatau ona ave ia i latou nei aemaise o lea ua tapuni a latou atina‘e mo le masina atoa ona o lenei taumafaiga e tali atu i le lē lava o fomai e tali atu i manaoga o falemai faaitumalo ua talosagaina ni fomai e faatautaia ai suesuega o gasegase o loo agai atu i aso uma.
O le totogi foi o i latou ua faaigoaina nei o Konesale (Consultants) e lē taugofie, pe o nisi e galulue i Samoa poo nisi foi e aumai mai atunuu mamao e faatino soo se auaunaga. O le tolu lenei o vaiaso o tau sailiili lava mai le Matagaluega o le Soifua Maloloina le faatulagaga o totogi ua ave i fomai ua faatautaia nei auaunaga.
Ua silia i le to‘a 10 tagata ua ta‘u mai e tatau ona talanoa mai i lenei mataupu. E oo lava i le taimi e lolomi ai le lipoti lenei e leai ma se isi ua faamatala mai totogi nei ua maua. Afai o le vaiaso atoa e galue ai le fomai i falemai faaitumalo – ae maua le siaki e $30,000 i le masina o lona uiga e lima aso o le auaunaga lea e maua ai lea tupe, e tusa lea ma le $6,000 i le aso.
Afai e tapa lea fomai konesale i le tausaga atoa ona faatele lea o le $30,000 i masina e 12. Afai lava o le totogi lea ua faapea ona malilie i ai, o le tulaga lava lea, ae o le fesili pe o ā nisi galuega a le Malo o loo maua e tagata Samoa ua faaaogāina ai konesale ua maua nei totogi ae ua fesiligia nei pe faamata e tatau ona iai ni fua faatatau e faatautaia ai totogi a konesale i Samoa lava ia.
Na tapa le vaega o loo feagai ma totogi faakonesale aemaise i galuega ua maua i tuuofoga, i le Ofisa o Tupe ma o le faamatalaga e eseese lava fua e agai i ai le Ofisa o Tupe i le totogi e tatau ona maua e lea tagata ma lea tagata i ana auaunaga ua ofo mai faafaufautua poo konesale. E faapena foi le tulaga o iai totogi o loo avatu e le Vaega lea e ta‘ua o le Oloamanu i le mau auaunaga faakonesale o loo latou tapa foi.
O le faamatalaga a lea ofisa e taugata totogi e ave i tagata faigaluega faapea pe afai e lē na o le tasi le auaunaga e faatino i le taimi e fai ai le tautua. O le faataitaiga, e lē na o le siaki o tagata mama‘i ae ua iai ma aoaoga ua faatautaia mo fomai ma tausi soifua e le tagata lea ua faafaigaluega faakonesale e le Malo.
O iina la e mafai ona tuufaatasi ai le pili a le tagata konesale lea ma faapea ona tuu atu e totogi mai i le taimi e tasi. Ae ina ua fesiligia pe talafeagai le totogi i le $30,000 i galuega ua faatino i totonu o aso e lima, e lei manatu lea vaega e talafeagai. “Afai na o le tasi lava le galuega o loo faatino i aso nei e lima o le masina atoa ua telē tele lena tupe,” o le faamatalaga lea a le sui na tapa sana faamalamalamaga i lenei mataupu.
Na fesiligia se tasi o le vaega o tupe a le Matagaluega o le Soifua Maloloina ae sau le tali o le polokalame lea e sau mai fafo le tupe ua faatino ai ma na ta‘u mai se fomai e fesiligia i lenei mataupu, peitai e lei avanoa lea tagata.
E faafā lelei ona tapa se avanoa i le Ofisa Sili o le Matagaluega o le Soifua Maloloina ae iu lava ina lē oo ia faatalatalanoaga. Na ta‘u mai le suafa o se sui o le ofisa lenei o loo feagai ma le polokalame lenei ae e lei maua mai lava se avanoa mo le pepa.
Na tapa se faamalamalamaga mai i se sui sinia o le Sosaiete o Fomai i Samoa, ma na ta‘u uma lava ia i latou nei le mataupu o loo sailia, ae uma lava ua lē tali mai le telefoni pe ua faapea mai e matuā tele fono e agai i ai ua leai ai se tali e mafai ona aumai.
E manino o loo faia lava nei totogi i lalo o le polokalame lenei ua faakonesale le faatinoga. Ae o le fesili pe faamata o vaaia se suiga lelei i le auaunaga faafomai talu ona amata lenei polokalame, ae ua tele ni soifua ua laveai mai ai? O le itu tāua lava lea i le sailiga lenei ae talu ai le faigata ona saili o se tasi e aumai se tali i le fua ua totogi ai nei fomai konesale, o le a faaauau suesuega.
