O se aso fiafia, ma se aso uigaese foi ma le malie, le aso sa faataunuuina ai le faamoemoe o fanau mai Aoga Amata e ala ia latou taaloga sa faia i le paka.
E malie ma uigaese, ona e fai mea malie isi, ae ulavavale isi, a o nisi lava foi e pule lava pe fia auai pe leai. Ae ui lava i ia uiga, peitai o le mau faafaiaoga, e iai lava uiga o soo se mea e faatino e tamaiti. Atonu o le ala foi lea, ua le afaina ai lava ia i latou uiga malie ma le faalogotata o fanau, a o taumafai e tau tatai mai i le sini ma le autu tonu o le aso.
O le aso taalo o le fanau e masani ona fai i tausaga taitasi, ma o le tausaga nei e valu aoga sa auai i le faamoemoe. E tolu aoga amata mai Otara, o le Tautua Aoga Amata, Fetu i Sasae Aoga Amata ma le St Peter Chanel.
E lua aoga mai Magele, o Fetu Taiala, o le Puna o le Atamai. E lua foi mai Papatoeote, o Fatugatiti Aoga Amata ma Papatoetoe Aoga Amata. E tasi sa fai ma sui o Otahuhu, ua na o Seugagogo.
O le sini ma le autu o le aso taalo, ina ia faamautuina ai le mafutaga a tamaiti ona e taua tele, ae sili ai foi faiaoga ma matua. O le faamautuina o le olaga taalo o le tamaititi, ma faagaioioi ai lona mafaufau atoa ai ma lagona fiafia.
O se avanoa foi e fetufaai ai lagona ma metotia ma faiga o soo se mea faatino i faiaoga, matua ma tamaiti.
O mea uma lava e aga i le faatauaina o mafaufauga ma lagona o le fanau, ina ia iloa ona tausinio i le manumalo.
E ui la ina faigata tele fuafuaga a le Komiti i le tau faasoasoaina ma le tau faatonutonuina o taaloga a le Olimipeka o le 2010, peitai sa faaiu manuia lava le taumafai o le fanau ma faiaoga.
E iai lava le au malolosi, iai foi le au feololo, ae le misi lava foi ma le au faalogotata.
O le faaiuga sa oo i ai le taumafai o fanau mai aoga uma sa tauva ma faatinoina le aso.
O taaloga sa faatino, e aofia ai le tuuga tamaoe 50 ma le 20 mita, o le tuuga e ave ai le fuamoa i le sipuni, o le tosoga maea, tuuga taga, o le tietie i le polo ma osooso, ma le hula i le mama ma tamoe.
O le susuga ia Noama Timoteo mai Fatugatiti sa faafoeina taaloga o le aso. O Mafa Futi ma Aloese Lefono sa faatulagina ‘ai o taaloga.
O le tulaga muamua, ma o le siamupini foi lea o le 2010, na tutusa ai aoga e lua, o Seugagogo mai Otahuhu, ma Fetu i Sasae mai Flatbush i Otara.
O le tulaga lua, sa maua e le aoga a le Tautua Aoga Amata mai Otara, tu tolu mai ai Fatugatiti Aoga Amata mai Papatoeote.
O le faailoga o le teine taalo sa maua e le tamaitai mai le aoga amata a St Peter Chanel i Clover Park, a o le tama taalo sa toe faamanuiaina ai foi le alii mai Seugagogo Aoga Amata.
O le sauniga lotu sa amata ai le faamoemoe o le fanau, sa taitaia e le susuga ia Eperone Futi. O le mae’a o le faiga lotu ona alo ai loa lea o le komiti ma le au taaalo a le lalolagi mo tausinioga o le aso.
O le viiga ma le faafetai i le Atua ina ua mae’a ma le manuia le aso taalo o le fanau, e pei ona saunoa i ai le faletua ia Aloese Lefono.
Sa ia ave foi le faafetai i Aoga Amata uma ona o le lagolagoina o le aso o le fanau, aemaise lava o faiaoga ma nai matua sa auai ai. Saunoa Aloese, o le tausaga muamua lenei ua toatele ai le aofai o aoga sa auai i taaloga, ma o le agaga lea e manatu ai o le a sili ona toatele isi aoga o le a faatasi ane i le tausaga fou. Faamanuia atu foi le Samoa Times mo le faamoemoe i le lumanai o fanau, ae talosia ia tulaga muamua le Fatugatiti i le tausaga fou.
