Uluai lotu faafetai i le Atua ina ua mafai ona toe tuufaatasia fuaifale ono i Maota Sa o ē na tupuga mai ia Tuala Taetafe
E tafe mai mauga manuia o nuu, aiga ma ekalesia, o le manuia mai mauga o Siona ua faasafua mai lava i lenei augatupulaga ua tatou iai.
O le ata manino lea ma le manuia sa maua mai i tuaa ua fai i lagi le latou folauga, lea sa patipatia ai e le Afioga ia Patele Talipope Tuala ma le mamalu i le fuaifale ono o Maota Sa i Leauvaa le alofa ma le agalelei o le Atua i totonu o le aiga.
O le Aso Toonai na faatumulia ai le malumalu o le Ekalesia Katoliko i Grey Lynn i mātua ma fanau faapea le afioaga o Leauvaa e faataunuu le finagalo o Patele, ina ia faia se uluai lotu faafetai i le Atua ina ua mafai ona toe tuufaatasia fuaifale ono i Maota Sa o ē na tupuga mai ia Tuala Taetafe.
O le afioga ia Patele o ia lea o le lupe faalele o le aiga i Maota Sa, ma o ia foi sa fuafuaina lenei faamoemoe. Na vaaia loimata o le fiafia i lea aso ina ua mafai ona maua se mafutaga mafanafana ma le fealofani.
Na amata le polokalame i se sauniga lotu tele sa faia, sosoo ai ma le misisa e pei ona masani ai. O le lupe faalele lava o le aiga ma le afioaga sa taitaia le sauniga faatasi ai ma le susuga ia Patele Filipo sa la galulue faatasi i lea aso.
O se tasi vaega tāua na afea i le saunoaga a le auauna a le Atua, ia pule le filemu o le Atua i totonu i o outou loto ma ia outou fealofani.
E silia i le luaselau mātua ma fanau o ē o loo alaala ma papaaao i Niu Sila nei faapea foi nai aiga na malaga mai i Samoa na latou faatinoina lenei faamoemoe. Na mae‘a le sauniga ona faaiu loa lea i se taumafataga tele sa faia i le faleaiga o le Manhattan.
O le Fofoga o le aso o le tofa ia Vaifale Mikaele ma le tofa ia Tevaga Paulo. Na faamae‘a le aso i faaaloaloga masani e pei ona masani ai le tatou atunuu i aso faapenei.