O Fereni Tautaiolevao o le lupe sa faalele e aiga ma mātua auā se manuia i le tulaga tau i le tulafono ma lona suesueina. Sa faalele ae tapuaia e lē gata o mātua, uso ma tuagane, ae faapea foi le ekalesia ma ona tauaiga potopoto.
O se luitau sa faapea ona molitalosaga i le Atua i le ao ma le po a o faapea ona faalelefulu mo se ‘ai auā le tapuaiga, ma se ala i le vaai tino atu i le taoto mai o le lumanai manuia mo aso o i luma.
Sa lē faigofie auā sa feagai ma le tele o fita talu ai o le tau faasoasoaina o le taimi i meaaoga, ae lē gata foi i lea o le faatinoina o nisi o ona tiute i totonu o le aulotu e pei ona avea ai o ia ma Faiaoga Aso Sa, ma se tasi foi o sui tautua i le aufaipese auā le lagiina o viiga o le Atua.
O le 2004 sa faaumaina ai ana aoga i le Kolisi Maualuga o Aorere i Papatoetoe, ona ulufale atu loa lea i le Iunivesite i Waikato i le tausaga e 2005 ma taumafai ai lana faailoga faaloia, seia oo atu i le faaiuga o le 2007.
O le amataga o le 2008 sa faapea ona toe foi mai ai ma tulitulimatagau le faamoemoe i le Iunivesite i Aukilani seia oo i le faaiuga o le 2009, e pei ona a‘e malo ai le lana faatautaiga. O le masina o Me i le tausaga nei 2010 sa faauuina ai o ia i le Iunivesite lava o Aukilani i le faailoga loia o le LLB, ae o le vaiaso na tea atu nei sa faapea ona faaulufaleina ai o ia i totonu o le Fale Faamasino Maualuga i Aukilani, ma resitalaina ai loa o ia o se loia e mafai ona ia tauaveina galuega faaloia i totonu o faamasinoga i Niu Sila nei.
Sa faaalia e le tamaitai o Fereni, sa lē faigofie lana taumafaiga, ae na te faafetaia lava le alofa o le Atua ona o Lona fesoasoani ua faigofie ai mea uma. Na ia faafetaia foi le tapuaiga a nai ona aiga aemaise ai lava o uso ma tuagane ma nai ona mātua pele, ona o i latou uma nei sa tofu sao i lana taumafaiga.
O se finagalo faaalia foi lea a nai ona tuaa, le susuga i le faafeagaiga ia Apolimatai ma le faletua ia Fanaua ona o le faamoemoe ua taunuu, o le laau lea o le soifua e pei ona molimau mai le Tusi Paia, ma e tatau lava la ona viia ai le Atua o le puna o mea lelei uma ma faamanuiaga e pei ona toia ai le ola tauivi o le afafine.
Na ta‘ua e Fereni, na lagona lona fiafia ina ua faaiuina ma le manuia si ana taumafaiga, ma e maligi ai loimata o le olioli ona o se malaga sa tauasa ma faigata, ao lea ua iu i le faaeaina. O le agaga fiafia foi lea e pei ona sa faaalia e nai ona tuaa, ona sa lē mapu le tuu atu pea i le Atua o le aoga a le afafine, a o lea ua tali mai ma le manuia, e lagona ai le maligi o loimata ona o le tapuaiga ua faaiuina fiafia.
O se tasi o moemitiga o le tamaitai loia o loo ua faataoto nei, o le taumafai lea i nisi foi o faailoga o loo totoe auā lava le faalauteleina o le silafia ma le tomai i mataupu tau i le tulafono, ae lē gata i lea, o lona agai atu ina ia tautua i si o tatou atunuu i Samoa i se taimi o i luma, o se auaunaga ua faananau nei i ai lona loto, auā sona sao mo Samoa ma ona tagata.
