Tatala faletalimalo Taito Galu i Samoa
Na amata le olaga taumafai i atinae tau pisinisi a le tama o Aii Taito Galu, mai Laulii, Vailele ma Samatau, i lona faleoti ulu i tausaga e tele ua tuanai, sosoo ai ma pisinisi tau faleoloa e oo mai i le taimi nei.
Peitai e le muta ai le finau pea ma tauivi o lea tamalii ma lona aiga e fia ausia se isi laasaga sili atu, e pei ona maea ma tatala sona faletalimalo ua faaigoa o “Le Fiafia Accomodation” i sona fanua e tolu kuta eka i Faatoia, e sosoo ma le aoga tulagalua o le Falefitu Primary School.
Na faamatala Aii i lona olaga tauivi na ia faamalosi atu ai i ona alo, e mulimuli atu i ona ala, e le fia galue e pule ai se isi tagata, ae fai ana galuega e pule ai lava ia ia te ia.
“Na ou fai i la‘u fanau, vaai toaaga i le aoga ae e sili atu ona e filemu ma ola fiafia pe a fai lava lau pisinisi ma pule oe ia te oe, aua nei pule mai fua le isi tagata ia te outou”, na faamatala ai le tama i le talanoaga ma le tusitala.
“E le faigofie le sailiga manuia mo si a‘u fanau aua e tiga ona ou lagona le vaivai ae sa ou tauivi pea, lea la ua matutua lau fanau ua tuu lava ia i latou e faatino a matou taumafaiga tau pisinisi”.
O Ianuari o le tausaga e 2009 na amata ai ona fuafua le fausia o le faletalimalo o le tama ma lona aiga e pei ona talosaga se nonogatupe e fesoasoani i seleni sa teu ma faapolopolo. Na faagasolo le galuega seia oo ina maea ma tatala aloaia i le amataga o lenei tausaga fou 2010.
E silia i le lima selau afe se seleni ua faaalu i le atinae ma o loo talitonu le afioga Aii e toatele nisi o le a fia faaaogaina fale ua saunia.
Na faamatala le tama o loo iai nisi mai le Malo Ausetalia o loo faiaoga i le aoga o matata eseese a le Pasefika o loo faafoe i totonu o le Iunivesite Aoao a Samoa i le nofoaga sa iai le Polytech o loo fuafua e nonofo i lona faletalimalo.
“O la‘u tala lea na fai i la‘u fanau, e lelei tagata e iloa nonofo ma vaai lelei fale, nai lo le tupulaga talavou ua oi ai nisi tagata e iai a latou pisinisi faapea ona ua nonofo foi ae toe faaleaga atu ai ma isi vaega o fale totogi”.
O le mau a le tama o Aii na ia iloa mai tagata e ana faletalimalo i le atu Aleipata na faaleagaina i le sunami, le lelei o seleni e maua i lea foi ituaiga o atinae ma o le pogai lea na taumafai ai lava e fausia se faletalimalo i lo latou fanua i Faatoia.
O fale ua maea fausia ua iai uma vaega e manaomia e tagata e fia faaaogaina fale e pei o mea fale ma totoga o le umukuka. E aoga tele mo aiga e fia tafafao i Samoa mo se tasi pe lua vaiaso foi, aemaise lava usugafono a ekalesia e tai vaiaso o faagasolo.
