Atonu o se faaupuga faapea e tau faaāta ai le faamatalaga a le alii o Samuelu Kainano lea ua avea nei ma faatamā i le alii Saina o Chinju Gao, poo Bob o loo iloa ai e lenei aiga.
I se faatalanoaga a le Samoa Times ma le susuga a Samuelu, na ia faaalia ai le mafuaaga na ala ai ona oo atu Bob i lo latou aiga.
Ua tolu po o moe i lalo o laau i se paka i East Tamaki, o le tala lea a Samuelu i le mafuaaga na feiloai ai ma Bob.
O lona atalii sa tafafao ai i le paka lea na iu ina faauo ai ma Bob ma aumai ai i lo latou aiga. Na faailoa e Samuelu sa o la tausia lenei alii talavou ua lata nei i le masina o faia pea lea amio, ma ua pei ai lava Bob o se tasi o le la fanau moni.
E oo mai i le taimi nei, e lei fetaui lava Samuelu ma lona toalua i mātua o le alii Saina lea, peitai o ni feutanaiga sa faia ma leoleo, ua faaalia ai e leoleo e pule lava Chinju poo Bob i le mea e fia nofo ai.
Sa faamatala foi e Samuelu, e na o le uluai vaiaso o le latou mafutaga sa faigata, ona sa na o le araisa e mafai ona tausami ai le alii o Bob.
Peitai o le taimi nei ua masani lelei i le talo ma fai.
O loo nonofo faatasi pea nei Bob ma lona aiga fou i Otara, lea e toafitu le fanau tama a le ulugalii, ae ua toavalu nei i le alii o Bob.
O le vaiaso na tea nei na faailogaina ai le sefulufitu tausaga o Bob i Otara, ma o se mafutaga fiafia e pei ona faailoa e le tina o lenei aiga, o Faleto‘a Kainano.
E toatele ua faaalia finagalo fiafia ma le agaga faafetai i si nei foi aiga ma le agalelei faaalia.
Mo Samuelu Kainano ma si ona aiga, o se avanoa e mafuta ai foi i sia talavou e ui ina eseese gagana ma lanu.
Ae mo le Tusitala, o se ata o le suamalie o le faailoa o le agalelei o le Atua i soo se tagata e pei ona finagalo ai o Ia mo soo se tagata i lenei lalolagi.
