E solitulafono le tagata ua sili atu aso o nofo i Niu Sila mai aso ua faatagaina i lona pemita. O le tagata e nofo i Niu Sila e aunoa ma le faatagaga a le Malo o Niu Sila, e toe faafoi lava i Samoa pe a oo i le taimi e sue ai ma maua. O le fesili e tulai mai, o se olaga lelei ea mo oe ma lou aiga, o le solasola solo mai le Matagaluega o Femalagaaiga nei maua outou ma tipoti i Samoa? Ae faapefea pe afai o iai ni tamaiti laiti i lou aiga? O se olaga talafeagai le ola mai o tamaititi i se aiga o loo ‘overstayer’ i Niu Sila? E faapefea aoga mo ia fanau? O le a se lumanai a maua pe afai e solasola solo ae le o i se aoga?
Afai lava o le faamoemoe o oe ma lou aiga o le nofomau i Niu Sila, e tatau ona tuusao le talosaga i le matagaluega o femalagaaiga. E tatau foi ona sa‘o ma faamaoni faamatalaga e tali ai fesili. Afai foi e manaomia le fesoasoani i le faatumuga o pepa, e lelei lou taumafai lava oe ia poo se isi i lou aiga e tali nei fesili aua e pau lava ia te oe le sao poo le sese o ia tali.
Afai ae maua mai le tali a le Matagaluega o Femalagaaiga e le mafai ona talia lau talosaga mo le nofomau, e tatau ona fesiligia mafuaaga ua teena ai lau talosaga. O le toe iloiloga o mafuaaga ua teena ai lau talosaga, e maua ai pe o iai se isi avanoa e talia ai lau talosaga, poo ni mafuaaga taua e tatau ona silasila i ai le Matagaluega o Femalagaaiga pe leai. Afai e iai nisi mafuaaga taua i luga o le tulafono e tatau ona toe silasila i ai le Malo, ona talosaga lea mo le apiliina o le faaiuga ua faia.
E mafai e soo se faipule ma lona ofisa ona fesoasoani atu i le toe iloiloga o faaiuga ma le faia o apili i le Minisita e aunoa ma se totogi. Afai ae maua mai lava le tali e teena lava lau nofomau, ona ou manatu lea e tatau loa ona toe fuafua mo le toe foi i Samoa, aua o le tagata e nofo i Niu Sila e aunoa ma se faatagana mai le Matagaluega o Femalagaaiga ua nofo sala ma ua overstayer i Niu Sila. Afai e te faigaluega pea a o oe e leai se pemita faigaluega, o lona uiga ua toe faaopoopoina tulafono ua e solia.
E leai lava se fesosoani a le Malo mo tagata ‘overstayer’ i Niu Sila. E le mafai ona e nofo i se fale a le Malo. Afai la o e nofo i se fale a le Malo, ua e toe soli foi le isi tulafono. E le mafai ona maua se penifiti aua e le o oe o se tagatanuu o Niu Sila, ma afai o maua sau penifiti, o lona uiga ua e faasese le Malo, ma e mamafa faasalaga o ia solitulafono. E le mafai foi ona e maua se fesosoani mai se falemai o Niu Sila, ona o loo e ‘overstayer’. Ae afai e fesosoani le falemai ia te oe, e aumai le pili a le falemai e totogi e lou aiga o loo nofomau i Niu Sila, aua e le o oe o se tagatanuu. O alo foi o i latou o loo ‘overstayer’ e le tatau ona aooga i Niu Sila. Peitai ane e iai lava aoga e alolofa ma talitonu e tatau ona faaaooga tamaiti laiti, ma e lipoti tamaiti i le Ofisa o Femalagaaiga aua o tamaiti o loo ‘overstayer’ i Niu Sila talu ai o latou matua.
E le o na o Niu Sila e faapea ana tulafono, e faapena uma atunuu o le lalolagi, e iai lava tulafono e aiaia ai tulaga mo le faatagaga o i latou e mafai ona nofomau, ma aiaiga e mafai ai ona maua fesoasoani mai le Malo. E le o se tulaga lelei le nofo sala i Niu Sila, ma e le o se tulaga e vaai alofa i ai le toatele o tagatanuu o Niu Sila. A faaopoopo la i ai ma faasalalauga i le anoanoai o tagata ‘overstayer’ i Niu Sila ua totogi tupe e avea ai i latou ma aiga a Maori, ma maua le stamp i o latou tusifolau e mafai ai ona nonofo i Niu Sila, ua toe laga ai le mataupu pe aisea ua le toe faafoi ai nei tagata ‘overstayer’ i o latou atunuu.
Ou te talitonu, e leai se malosiaga o le stamp a Maori i lou tusifolau i le silasila a le Ofisa o Femalagaaiga, aua e na o le tasi lava le Malo o Niu Sila, e tasi foi le matagaluega a le Malo e nafa ma mataupu mo le femalagaai o tagata. O loo teena foi e le lautele o Maori le malosiaga o le pepa faapea e avea ai oe ma tagatafai a Maori.
Afai ua e ‘overstayer’ i Niu Sila, ma ua teena lau apili e le Malo, e tasi lava le auala e faamama ai oe, o le toe foi i Samoa ma toe taumafai ai talosaga mo le nofomau i Niu Sila.
