I tali a le Malo i fesili sa ou fesiligia ai i le vaiaso ua tea ua faamanino mai ai e silia ma le $800,000 le tupe o loo nofo aitalafu ai nisi o kamupani tuma‘oti i le Malo.
Sa iai se polokalame a le Malo sa totogi ai i ia kamupani se vaega tupe e lē silia ma le $5000 pe afai e faafaigaluegaina e ia kamupani nisi o tupulaga talavou i se polokalame ua taua o le ‘Job Ops’.
Afai e faatea e ia kamupani nei tupulaga i lalo ifo o le ono masina, pe faamuta e ia kamupani le auaunaga o nei tupulaga ae e lei atoa le 6 masina, e tatau i ia kamupani ona toe totogi mai tupe sa avatu i ai i le Malo.
Talu mai le amataga o lea polokalame i le tausaga 2009, e 507 tupulaga talavou ua faatea mai galuega sa galulue ai i le polokalame o le ‘Job Ops’ ae e lei atoa le 6 masina talu ona faigaluega. I lalo o tuutuuga o lea polokalame, e tatau i nei kamupani ona toe totogi i le Malo tupe sa latou taliaina mo le faafaigaluegaina o nei tupulaga, ae e lei atoa le 30 aso talu ona faatea ia tupulaga.
Peitai ane e oo mai i le aso 16 o Aukuso o lea e 477 kamupani tuma‘oti e lei toe totogiina i le Malo le tino i tupe o le $814,541 e tatau ona toe faafoi i le Malo.
O se tulaga ua lē talafeagai le faiga o lea ua faia e nei kamupani, le taofiofi o ia tupe i latou tusi tupe ma maua ai se tului mai faletupe, a o tupe e tatau ona toe totogi vave i le Malo. Afai o lea e tulituliloa i se tulaga faanatinati e le Malo latou ua ova i ai se penefiti, aisea ua lē faanatinati ai le toe tapa i nei kamupani ia toe vave totogiina mai lea tupe i le Malo? O i o loo aliali ai faiga faaauau a le Malo i latou faigauo ma nisi o le aufaipisinisi ma kamupani.
O lea e silia ma le 84,000 tupulaga talavou i le va o le 19-24 tausaga e lē o aooga, e lē o iai i se polokalame aoga, e lē o faigaluega foi e tatau ona faaaogā i ai lea vaega tupe e fesoasoani mo latou, peitai ane e oo mai lava i le asō, o loo taofiofi e ia kamupani lea vaega tupe tele i latou tusitupe.
I faamaumauga o tupulaga talavou i le va o le 15 agai i le 19 tausaga le matutua o loo manino mai ai e aupito i sili ona maualuga le fuainumera o le vaega o le itupa o tamaitai o le Pasefika e leai ni galuega poo le ‘unemployed’.
Afai e faatusatusa ma atunuu o Europa e aupito i maualuga atu le fuainumera o tamaitai Pasefika e leai ni galuega i lo Amerika, Egelani, Aialani, Italia, ma Potukale. E maualuga atu foi le fuainumera o tamaitai Pasefika i lo alii Maori ma alii Pasefika ma le fuainumera o tupulaga talavou Pasefika ua tuua faatasi e leai ni galuega.
Afai o nei tupulaga talavou faato‘ā atoa le 15 poo le 19 tausaga le matutua a o lenei ua lē toe o i se aoga, ma ua leai foi se galuega o faigaluega ai – o le ā nei se tulaga o le a oo ia i latou?
E lē o le autū ea na mafua ai ona tatou tuua nuu ma aiga i Samoa ae malaga mai i Niu Sila ona ia maua se lumanai manuia mo le fanau? E faapefea ona maua se lumanai manuia pe afai e faaletonu mai le fanau i aoga?
A ou fesili atu foi i nisi o le fanau pe mafua i se ā ona lē faia mea aoga, a o le tali fai mai nisi, ona o le pisi i feau i aiga. Poo le pisi foi i mea faaleekalesia, poo mea faaleautalavou.
E moni lava e tāua uma nei vaega i le olaga o le Samoa, ae e lē talafeagai ea ona tatou galulue ina ia tumau le lagolagoina o tatou alo ma fanau ina ia faamuamua le faiga o mea aoga, lagolago i ai ina ia lelei le tulai mai o latou i avanoa aoga? E lē o toe faigofie lava galuega i nei aso. Ua uma aso sa malolo mai ai i le isi galuega, toe savali atu i le isi kamupani toe amata lava i lena aso se isi galuega fou. Ua uma foi aso, sa galulue le toatele o tamā i galuega e lua.
O nei aso, afai e leai sau faailoga maualuga, afai foi e leai sau tomai faapitoa, ua lē faigofie ona maua se galuega. Afai foi e maua galuega e aunoa ma le manaomia o se faailoga poo se tomai faapitoa e maua foi ae maualalo totogi.
E tusa foi lava pe afai ua faigaluega, ae ia saili pea avanoa e aooga ai lava ina ia maua se faailoga poo se tomai faapitoa.
Sa ou faalogo o faamatala e se tasi o tamā le faigata sa la galulue ai ma lona toalua ina ia maua la tikeri mai le University of Auckland. Fai mai e tasi le pepa i tausaga uma lava mo le 8 tausaga sa la faia ma lona toalua. E ui ina umi ae na mae‘a ma ua fiafia lava e faailoa ua maua uma la tikeri ma lona toalua ma ua avea ai nei laua ma faiaoga.
Poo le ā lava le faigata, ae pito i sili atu ona manuia le lumanai mo tatou fanau pe afai lea e saili muamua ia lelei aoga.
