E laitiiti mamao se tupe e alu i se loia e na te faitauina, fautuaina, ma fesuiai se feagaiga faaletulafono mo oe poo lou aiga a o lei sainia. Aua le saini lē malamalama se feagaiga.
Poo le ā se ituaiga feagaiga, e tatau lava ona e saili se fesoasoani a se loia na te fautuaina oe i upu tusia i le feagaiga lea e i ou luma, ma le tulafono a o e lei sainiina ni pepa e te lē o malamalama ai.
O mea nei na tutupu mai ua ala ai se fautuaga:
O se faifeau ma lona toalua sa matuai lavelavea lava i le tulafono ona o le saini o pepa o se feagaiga e faatau ai e laua se fale, mai le tagata e ona le fale na nonofo totogi ai le faifeau ma lona aiga. Ae mulimuli ane ua lē tausi feagaiga le faifeau. Tagi le ulugalii e ona le fale e totogi atu tupe e fia sefulu afe ua lē faamaoni ai. Susulu mai i se fesoasoani faaloia, ia aua ne‘i BANKRUPT, auā a Bankrupt loa ua lē tatau ona faifeau.
O lenei ua manuia le taumafaiga faaloia, ua sefe lenei faifeau ma lona toalua ua lē Bankrupt, ma ua soloia foi tele o tupe na tagi le ulugalii papalagi i le fale faamasino e totogi atu. A o lenei foi ua sauni le tagi a le ofisa loia (lawsuit), ona ua lē faamaoni foi lenei faifeau i le totogiina o le pili a le loia na fesoasoani i ai. Sa saini le feagaiga ma le loia i le tupe e totogi mai i le vaiaso o le feagaiga tusitusia, e leai la se popole o le loia auā o loo faamaoni le feagaiga sainia.
Fautuaga: E lē maualuga ma sili a‘e le tulaga faafaifeau i le tulafono. E telē le tiute o faifeau auā o tagata o loo ave i ai le faamoemoega ma faatuatuaga o tagata. A lē faamaoni la le faifeau e fai le mea sa‘o, o le a ave le tagi i le Court, e faasa‘o amio a faifeau.
Sa ta‘ua i le tatou tusitusiga muamua se tina na faatau se pisinisi ae tusi ai le igoa o lana tama la e aoga, ona alu lea o le tina ave le feagaiga “Agreement for Sale and Purchase” faasaini ai lana tama. O ananafi na tuai ai si nei tama i le falefaamasino ona ua ave le tagi a le tagata e ona le pisinisi, e lei totogi atua le tau o le pisinisi e le tama. O le mea e sili ai ona faigata, ua saini si tama aoga, e aunoa ma se malamalama i tusitusiga ninii faaletulafono la e tusia i le pepa na ia sainia.
O le tagata e ona le pisinisi lea na faatau e le tina o le tama aoga, sa fai i le tina o le tama aoga, e aua ne‘i o fua i se loia, ona e taugata. Ae fai lē e ona le pisinisi i le tina o le tama aoga, e tago le tina e tusilima ni feagaiga se lua. Ona saini lea o lana tama, ma avatu ia te ia le isi feagaiga ae tuu e le tina le isi feagaiga. I le suesuega faaloia ina ua maua mai pepa tusitusia na faila e le tagata e ona le pisinisi i lana tagi i le Court, na mauaina ai mea nei:
• Sa toe tasui e le tagata faipisinisi le tau o le pisinisi, e aunoa ma se faailoa i le tama lea na sainia le pepa, ona tago loa lea o le tagata e ona le pisinisi lea e faatau, saini le feagaiga.
Fautuaga: Aua le saini se pepa e se tagata e toatasi, ona ave lea e sainia i le isi tagata i se taimi mulimuli. E pei la o le mea lea na tupu i le feagaiga lea, ua nofo le tagata e ona le pisinisi lea e faatau, sui le tau o le pisinisi, tuu i ai lana saini. Alu loa le tagata e ona le pisinisi, tagi i le Court e totogi atu le tupe lea e i luga o le feagaiga lea ua iai saini e lua. E faaali atu i ai e le tina ma lana tama e ese le tau na malilie i ai, lea e i luga o le feagaiga lea na saini e lana tama, ma uu e le tina, ae fai mai le tagata faipisinisi ma lana loia, e lē taulia le feagaiga lea ei le tina o le tama ma le tama, ona e lē o iai le saini a le tagata faipisinisi. O lenei ua tele tupe a le tina ma lana tama e tetee ai le tagi lea ua i le Court a le tagata e ona le pisinisi, talu ai le lē sailiina o se fesoasoani i le taimi muamua.
• O le feagaiga lea na alu ma le faipisinisi i le Court, o loo iai le lisi o meatotino a le pisinisi lea e faatau. O lenei faato‘ā maua i suesuega a le loia a le tina ma lana tama, o meatotino lea e iai i le lisi e lē o ni meatotino a le tagata lea na faatauina le pisinisi. O meatotino a le Landlord e ona le fale lea e fai ai i totonu le pisinisi.
Fautuaga: Aua le sainiina se feagaiga ae lei suesueina poo ai e ona meatotino ia e lisi i totonu o le Feagaiga. Fesili i se faamaoniga, o meatotino lea e i totonu o le feagaiga, o ni meatotino moni, a le tagata lea e fai le lua feagaiga.
• Sa mauaina i le suesuega a le loia a le tina ma lana tama, sa saini le tama ae lei iai se faatagaina o le ave o le lisi o le fale lea e fai ai i totonu le pisinisi, i se isi tagata “No Assignment of Lease” . E oo foi i le feagaiga lea na saini ai le tagata lea e faatuina le pisinisi, e lē o iai foi se Assignment of Lease.
Fautuaga: E tatau lava ona suesue poo ai e ona le fale la e iai i totonu le pisinisi, ma vaai po ua iai se Assignment (faatagana mai lē e ona le fale, a o lei sainia se pepa).
Sa iai i le faipisinis le manatu a alu i le Court e mafai ona ia faamalosia le tina ma lana tama e totogi le tau maualuga lea na ia suiina. Na lilo i le faipisinisi, o lea ua fai loa le loia a le tina ma lana tama, o lea ua maua ai mea sese ma le solitulafono na ia faia. E leai se avanoa i le tulafono e mafai ai ona tausisi le faipisinisi i le tau maualuga.
O lea ua fautuaina foi le tina ma lana tama e ave se la tagi i le Court i le faaseseina o laua, i meatotino ma le leai o se Assignment of Lease.
