Ua le fia nofonofo le vaega faaupufai o le Tautua Samoa i le tali atu i le lafoga a le Palemia na lalau ai le palaai o se tasi o faipule o Safata, le Afioga Palusalue Faapo II, i lona faitioina o le Palemia ma le Malo i le teuteuina o le tulafono o faiga palota ma le Vaega 46 o le Faavae ina ia faaleaoga ai tofi faipule o le Tautua Samoa.
I se feiloaiga ma tusitala na faaalia ai e sui o lea pati faaupufai, e le palaaai i le teuteuga, ae o le Palemia o loo palaai ina nei salalautasi ma malepe le HRPP.
O loo faanoanoa le Tautua Samoa, ona o loo faatatau le teuteuga ia i latou ma le latou pati, ona ua faamatau ai le maopoopoga o le vaega faaupufai o le HRPP.
Ua ave le lu‘i a Palusalue Faapo II i le Palemia e toe foi uma le Palemene e faatino se palota faanatinati lea e taua o le snap election e faamautu ai ua palasi le tulaga lagolagoina o le HRPP e le atunuu ae ua maualuga le lagolagoina o le latou itu.
Peitai na faaalia e Tuilaepa e leai se mea o le a faia ai se palota mo ia aua na filifilia o ia e lona itumalo e aunoa ma se palota na faia.
E le o fia toilalo le Tautua Samoa i le finauga lenei ona e le o faamalieina i mafuaaga ua folasia e le Malo ua teuteu ai le faavae ma le tulafono o palota.
Tumau le su $10 miliona
Ua faaauau pea le tagi a le Tautua Samoa e $10 miliona faasaga i le Fofoga Fetalai ona o le faaleagaina o lo latou tulaga tauleleia i le faaiuga na soloia ai o latou tofi faipule, ae na mulimuli ane faaleaoga le iuga lea e le faamasinoga maualuga na ave i ai e le Tautua Samoa le faaiuga a le Fofoga o le fono.
Ua faamaonia mai e le loia a le vaega faaupufai o Rosella Papalii le logoina o ia e le vaega faaupufai e faaauau pea ona tuuina atu le mataupu.
O le asō, 2 o Novema 2009 o le a toe valaauina ai mo le tuuina atu o le tali tusitusia a le Fofoga Fetalai e ala mai i lana loia, ona faatoa iloa ai lea o se aso e suesueina ai mau a itu e lua.
O le maea o le faaiuga a le faamasinoga na soloia ai le iuga a le Fofoga o le fono, na toe folasia ai e le taitaifono o le Tautua Samoa le Tofa Lealailepule Rimoni Aiafi, o le a le faataunuuina le su e $10 miliona ona ua lagona foi le agaga o le loto faamagalo.
Peitai e iai le talitonuga o nisi sa fesiligia mo ni o latou manatu faaalia i le mataupu, ua mafua ona faaauau pea le tagi ona ua see atu le malo e teuteu le faavae ma le tulafono o palota i le naunautaiga e faataunuu pea le iuga na faia e le Fofoga Fetalai.
O le faavae o le finau a sui faipule o lea pati i le palemene ina ua talanoaina teuteuga, ua tulituliaupu lava le latou itu e le alii Palemia ma lana taupulega, ina ia maua pea se ‘ai o le faaiuga a le Fofoga Fetalai.
O loo teena e Tuilaepa lea tuuaiga i lana faamalamalamaga i le Palemene talu ai nei, o le autu o teuteuga o le saga faamausaliina o le maopoopoga o vaega faaupufai ma ia mulimulitai faipule ia latou faiga upu ma itumalo i le taimi na manumalo ai, ae le o le manumalo, toe sui le pati e alu i ai.
O se teuteuga o loo lagolagoina e tagata palota e talitonu o le mau a le Malo ua matua lelei lea e tausisia ai e le sui faipule le pati e alu i ai.
