E oona le tui a le oti, pagā lea ua misia le mafutaga mafana

O nisi nei o upu o le pese sa lagiina e le tinā faavauvau ia Fia‘ese Fetoa‘i sa vaaia ai le laufofoga maligi o le toatele, i le taimi o lana molimau i toe sauniga o si ana manamea, si ona toalua poo si ana pele i le tau gaga ifo o le la o le 2009. O le pese lava lea e la te usuina toalua i taimi uma o a latou sauniga.
O le aso faaiu o le masina faaiu o le tausaga ua mavae (31/12/2009) na faatofa atu ai i le tofā ia Pauli, Mapuinuumanaia Lealailepule Charlie Fetoa‘i ina ua fai i lagi lana folauga ma malolo atu i le tuugamau. Na soifua mai o ia i le aso 10 o Me i le tausaga e 1956, ae faamanavaina ana galuega i le aso 21 o Tesema 2009.
O se tamā e faagalogatā ona uiga, o se tagata foi e alofagia e le toatele o tagata e pei ona molimauina i le taimi o le sauniga, e lata i le 500 i latou na faatumulia ai le malumalu o le ekalesia Katoliko i Inala. O le mafuaaga foi lea na umi ai le sauniga ona o le talosaga mai o le tele o tagata i ni nai minute e fai ai ni nai molimau i uiga faaalia ma le tausaafia o lea tama i taimi a o soifua mai o ia.
E silafia uma foi e tagata auā sa fai lona fale ‘oti ulu, e tele ina faafuga fua uma ai ao o le tele o tama e masani ai Mapuinuumanaia Charlie Fetoa‘i. O le tamā ia Mapuinuumanaia Charlie (Salelologa & Matautu Falealili) na malaga atu i Samoa ona o le tau faatoaina o se fanua i Apia aua se lumanai manuia o le fanau i taimi e malaga ai e faimalologa i Samoa, peitai, na maliu ai lava o ia e leai se tala.
O le toalua ai lea o tamā o Kuiniselani ua malaga atu e faimalologa i Samoa, ma ua maliliu ai lava. O le tasi o tama o Tunai Lemi Sio mai Leauvaa.
I se molimau a le tamā ia Pauli Ituau Atipopo Wongkee, (o ia foi e malaga atu i Brisbane) o ia lea sa muai mauaina Charlie ua maliu, a o feagai le autufuga ma le fauina o lona maota i lona fanua faatau i Vaitele, o le aso foi lea sa malolo ai Mapuinuumanaia Charlie i le fale ona sa lei atoatoa le malosi ia te ia.
Sa asia loa e le tama ia Paulu Ituau Atipopo Wongkee e fai foi sina evaga ae paga lea e taunuu atu o loo saofai mai lava Mapuinuumanaia Charlie i luga o le nofoa o le laulauai. Ua fiu lava e tuu fesili atu ae leai se tali mai pei a o la e moe nofo. Sa ia soso atu i ai ma ia mautinoa ai ua alu lava le malaga a Mapuinuumanaia Charlie.
Sa ia viliina le taaavale a le falemai ma tuuina atu i le falemai peitai ua leai lava. Na logoina mai le tinā ia Fia‘ese ma le fanau ma o se aso na faateia ai le aiga atoa. Na auina mai le tino maliu ole tamā i Brisbane nei e tusa ai ma le manaoga o le fanau aemaise le tinā loto faavauvau.
O le alo o le tofā ia Mapuinuumanaia Charlie, le alii o Folau Charlie Jr e taalo i le au lakapi a le Queensland Red, o ia lea sa sili ona faamāmāavega ma faamalosi i nai ona tei ma si o latou tinā aemaise le fesoasoani malosi i vaega uma sa manaomia.
I lea lava foi sauniga sa ‘auai uma ai nisi o tama taaalo a le Queensland Red faatasi ai ma le Coach a le ‘au, ma o le ala foi lea na matuai malosi ai le loto o le alii o Folau Charlie Jr i toe sauniga o si ona tamā.
O sauniga uma o lea po sa taitaia lava e le uso o le tofā ia Mapuinuumanaia Charlie, le Susuga ia Tamala Seumanu Folau Fetoa‘i, o le Taitai Toeaina o le matagaluega Ekalesia Aso Fitu Samoa Tutoatasi i Brisbane lava. Sa saunia se upu faamalosi e le Susuga ia PS Faavae Avia (AOG) o le faafeagaiga lea o le ekalesia a Mapuinuumanaia Charlie Fetoa‘i ma si ona aiga.
O le taumafataga ma le iputi sa tapenaina e le tofā ia Pauli Ituau Atipopo Wongkee ma le faletua ia Line o se tasi o faleaiga lauiloa i Brisbane le WKK SUPER SUPPER o lana fesoasoani lea mo peau faamavae o le tamā ia Mapuinuumanaia Charlie.
O le fofoga o le aso o le susuga ia Tuiloma Puletiu‘atoa, a o le lauga autu o le aso sa feagai lea ma le tofā ia ‘Otemai Gaseata e fai ma fofoga o le aso i le paia o aiga-na-lua. O le tootoo o Lufilufi sa fai ma fofoga o le aufaigaluega paia a le Atua ma le usoga a Tumua ma Pule na potopoto e molimolia se agaga faafetai e tusa ai ma faaaloaloga matagofie sa feagai ai.
Sa saunia e le susuga i le Failautusi o le Ekalesia AOG Samoa, Ps Taeauga Ropati Frost se tatalo faaiu ma taape ai le fuamanusina.