Ua maua i lipoti ua taunuu mai i lo tatou ofisa i Samoa nei le talanoaina e nisi o alii ma faipule i le atu Aleipata o se malaevaalele i lea itu o le atunuu.
Afai e taunuu, lona uiga o le malaevaalele lona tolu lea o le a fausia i le motu lava ia o Upolu.
O le faamatalaga ua oo mai, ua faalua ona fono alii ma faipule o le afioaga o Lalomanu ma ua talanoaina ai le tulaga o fanua e ono faaaogā i lenei atina‘e pe a taunuu.
O le afioaga o Satitoa o loo ua iai nei le uafu fou lea ua mae‘a ona toe faaleleia, ma o le vaiaso fou lea ua talanoaina ai le amata o femalagaaiga o vaa i le uafu lea o Aleipata.
O lea la talanoaga ua faaopoopo ai se isi foi atina‘e o le a fesootai ai lea itu o Samoa ma isi vaega o le atunuu aemaise lava i le va o Samoa ma Amerika Samoa.
O le latalata lava o lenei itu o Upolu i le motu o Sasa‘e, o se tasi lea o mafuaaga o le unai o le Malo ina ia mafai ona iai ni fesootaiga tau felauaiga mai i Aleipata.
O le tulaga e pei ona iai le talanoaina o se malaevaalele i lea itu o Samoa e lei faalauaiteleina ma e umi se taimi faato‘ ā vaaia le tino mai ona o loo talanoa muamua le itumalo i le faaaogāina ai o fanua o lea itumalo mo lea faamoemoe.
Afai foi e taunuu ua mautinoa le faafaigofie ma le latalata ai o femalagaiga i Amerika Samoa.
O le taimi lenei e tasi lava le malaevaalele o loo mafai ona faafoe mai i le motu tele i Salafai lea o loo i Maota. O le isi malaevaalele lea foi na mafai ona maua ai femalagaiga mai i Asau ua lē o toe faaaogāina foi i le taimi nei.
O le malaevaalele i Fagalii lea na tapunia mo ni nai tausaga, ua toe faaauau le faaaogāina. Sa tapunia ona o le manaoga o le afioaga o Fagalii i se toafilemu mai i le tele o femalagaiga sa faatautaia ai, ma o se popolega o le afioaga i le saogalemu o aiga nonofo latalata ane i lea nofoaga na iu ai ina tapunia.
E ui i lea na toe tatala lava le avanoa ona o le tele o le aafiaga o le tamaoaiga o lea foi itu o le Vaimauga ina ua aveese le malaevaalele laititi sa iai.
O le taimi lenei ua na o le kamupani vaalele o le Polenisia o loo faaaogāina le malaevaalele lea i Fagalii mo femalagaiga i le va o Samoa ma Amerika Samoa. Talu le toe tatala ai o femalagaaiga i lea nofoaga, ua vaaia le toe foi o atina‘e i se tulaga lelei e pei ona iai i tausaga ua mavae.
E tapunia lava i le ao femalagaaiga a vaalele mai i Fagalii ae o malaga e agai mai i le pogisa mai Amerika Samoa ua toe tuli lava le malaevaalele faavaomalo i Faleolo.
O vaalele a Amerika Samoa o loo agai mai lava i Faleolo mo a latou femalagaiga ona e lē o iai se manaoga e faaaogā le malaevaalele i Fagalii. E iai le popolega faapea e laititi tele le auala e tulaueleele ai vaalele i lea nofoaga.
O se faigamalaga la mai i Aleipata o le a telē foi se fesoasoani i le itu tau i atina‘e i lea itu o le atunuu ma e lē taumate le vave ai ona mautu se taulaga o Aleipata lava ia. O le a se‘i tulimataia pea le tulaga e oo i ai feutagaiga o lea atina‘e tele pe a tino mai.
