Ua folafola e le vaega faaupufai o le Tautua Samoa se isi fusuaga ma le Malo i le faamasinoga maualuga pe afai ae pasia e le Palemene se tasi o teuteuga o le Tulafono o Faigapalota e talitonu faipule o lea pati, o loo faatatau tonu ia i latou ma le faatuina o le latou vaega faaupufai.
O le teuteuga lea o loo faamamafa ai le tutumau o sui tauva o se palota faapalemene ia latou vaega faaupufai e tauva ma manumalo ai, ma tutumau foi o ni faipule tututoatasi i le taimi ua maea ona faatauto ai sui faipule ua filifilia mai se faigapalota a le atunuu.
O le finagalo o le taitaifono o le Tautua Samoa, le tofa Lealailepule Rimoni Aiafi i se feiloaiga ma tusitala, afai ae pasia i le paeaiga o loo iai nei a le palemene lea teuteuga, o le a soloia loa o latou nofoa ae toe foi i o latou itumalo e faatino ni palota laiti e toe sailia ai nisi sui faipule.
“Saunoa le afioga i le alii Palemia o lenei mea e faia e le Tautua e faatogafiti taufaavalea, ia o lafoga ia malolosi a le Palemia a o lea ua uma ona ave i le tulafono ua faamaonia e leai se togafiti ma ni faiga taufaavalea ua faia e le Tautua.
O lea e manino le mata o le vai mai le amataga o le Tautua Samoa, o se fuafuaga mo le isi faigapalota ina ia faamalosi ai le Itu agai e agaia le Malo”, o le finagalo o Lealailepule. Na faaalia foi e Lealailepule o le latou matau ua faatatau foi le teuteuga i sui faipule o le HRPP ia aua nei taumafai e o ese, ona ua iai nisi o sui ua le lagolagoina lea vaega faaupufai.
“I lo matou talitonuga e le o toe iai se faatuatuaga o le Malo i le latou lava vaega aua o lea ua taofia faipule o le HRPP mai le femeiai solo, aua o matou faipule o le Tautua poo fea lava le mea e femeiai solo i ai e le suia ai se faigamalo”, o le isi lea finagalo o le taitaifono.
O le tasi o sui faipule o le HRPP ua faamavae ma ua lagolago i le Tautua Samoa, le afioga Palusalue Faapo II na ia faitioina malosi le Malo i le teuteuga ua faia, i lona talitonuga e autu i le soloia o lona nofoa.
“O se faaupuga faigofie o le teuteuga o le tulafono ua iai nei, o se teuteuga e soloia ai o matou nofoa ma soloia ai lo‘u nofoa, aua o loo aumaia pea e le alii Palemia afai na palota oe e te sau e te sui tutoatasi poo se sui o le HRPP e tatau ona tumau ai pea, lelei.
Ae e iai sui o le HRPP i le taimi nei na palota mai e o latou itumalo e tutoatasi ae na o i le HRPP, o le taufaavalea la le mea lena e fai nei e le Palemia.
E tultuliaupu matou e o e fai matou palota laiti, ae omai ia sui sa palota i ai o latou itumalo e tutoatasi o i le HRPP.
O lona uiga e ese le tulafono e lima taitaiina ai sui tutoatasi a lenei itu ese le tulafono mo sui tutoatasi a le HRPP”, na saunoa ai Palusalue Faapo II.
O loo lagolagoina e le Tautua Samoa isi teuteuga ae e tasi lava le teuteuga o le Tulafono o Faigapalota o loo ilitata i ai o latou finagalo.
Ua aiaia foi i le teuteuga le tapu ona toe faia ni faalapotopotoga a sui faipule ua tautino itu ua lagolago i ai, i fafo mai o le Palemene e pei ona faatino e le Tautua Samoa.
O lona uiga ua le mafai ona toe faapotopotoga ni sui faipule i tua mai o le palemene e faia ni tapenaga mo se isi faigapalota a le atunuu e pei ona autu i ai le faatuina o le Tautua Samoa.
O sui e tauva tutoatasi o loo avanoa ona ave lana lagolago i se pati faaupufai pe a manumalo mai i se palota, peitai a oo i le taimi e faatauto ai sui faipule ua filifilia ae e lei faia sea filifiliga, o le a aloaia loa le avea ma faipule tutoatasi mo le paeaiga atoa a le palemene.
O se isi vaega o le teuteuga o loo taua ai e faamavae loa se faipule ma se pati e le toe maua le avanoa o iai nei e alu ai e tutoatasi, ae otometi lava le soloia o lona nofoa ae foi e toe faia se palota laititi.
