O le tulafono o le Matagaluega o Aoga, o loo taofia ai tamaiti o loo nonofo solitulafono i Niu Sila mai le ulufale i aoga, ua foliga mai ua tautalagia ma ua fautuaina. Ua iai nei se suiga o lea tulafono, ma ua tuuavanoa ai mo fanau uma e lē o mafai ona aooga, e ala i le tusi talosaga nei loa i le matagaluega mo le faatagaina ma aveese mai le tulafono tuai sa iai.
Sa faafiafiaina le finagalo o le tamaitai o Runnitty Peteru, o ia sa taiulu i ai le fonotaga sa feiloai ai ma mātua aemaise o fanau o loo nonofo solitulafono i totonu o Niu Sila, ae o loo fia maua foi se avanoa e faaulufale ai i a‘oa‘oga ona e lē agavaa i lalo o le tulafono a le Matagluega o Femalagaiga a Niu Sila.
O le fonotaga lona lua lea talu ona fofogaina ma amataina lea galuega fesoasoani. Sa ta‘ua e le tamaitai faiaoga, o ia foi o le pule lagolago o le aoga a Panama i Aukilani i Sasae e faapea, o le fonotaga muamua sa faia, sa lei toatele nisi na auai.
Ae ui i lea, sa ia mautinoa lava o loo toatele nisi mātua ma isi fanau o loo iai pea i lea faafitauli, ae masalo o le lei lelei ona faia o se faasalalauga faalauaitele.
O le vaiaso na sosoo ai, o le vaiaso lea na tea nei, sa toe faia ai le isi fonotaga, ma sa maua ai foi ma le avanoa e faasalalauina ai i le Radio Samoa.
E lē gata i luga o talafou, ae faapea foi faasilasilaga faalauaietele. O le fonotaga lea sa maitauina ai le toatele na lolofi ane mo le fia maua o le fesaoasoani e pei ona sa taulai i ai le fonotaga sa faia.
O le faamalamalamaina o le suiga o le tulafono a le Matagaluega o Aoga, e agavaa ai fanau e ova aso i Niu Sila, mo le ulufale i aoga i totonu o le atunuu. E lē gata ina sa faamanino ai ia suiga, ae faapea foi le va o matagluega e lua, o Aoga ma Femalagaiga.
Na ta‘ua e Runnitty i se feiloaiga ma le Samoa Times e faapea, sa matuā fiafia tele ina ua ia maua se polokalame mai le ofisas o aoga, sa faamalamalama ai lea faiga fou. O le ala foi lea sa lē nofonofo ai, ae manatu loa ina ia tufatufa lea tala lelei mo tagata Samoa.
O le fonotaga sa faia i le afiafi o le Aso Toonai o le vaiaso talu ai i le nofoaga East Tamaki Community Hall. Sa auai nisi o Loia Samoa ma le Pasefika i le sainia ma le tulaga tau i le tulafono.
O le Immanuel Worship Centre i East Tamaki sa fesoasoani tele ma lagolago malosi i le faamoemoe.
O i latou foi sa fai ma taiala i le polokalame atoa, a o galulue ai Loia ma le tamaitai o Runnitty Peteru i le faatinoina o le tele o galuega tau i le faapepaina ma le tuufaatasia o talosaga.
Sa faamaonia mai foi e Runnitty, sa maitauina i lea afiafi le manaomia tele o le fesoasoani mo fanau, ma ua iai foi le manatu o le a toe fuafua nisi o fono faapea i nisi pitonuu o Aukilani e pei o Sisifo.
O aiaiga a le Matagaluega o Aoga ua leva ona sau ai i le tele o tausaga ua mavae, e lē mafai ai ona aoga soo se tamaitiiti ma se teineitiiti pe afai e ova aso i Niu Sila.
Peitai o le suiga e pei ona taumafai e faalauiloaina, o loo aiaia ai le mafai ona tuuina i totonu le talosaga, ma o le a mafai ai ona maua le avanoa e aoaga ai i tuutuuga faapitoa.
