Ua amata motu ese le auliki a le Bulldogs i le tumutumu o le tauvaga i lona vaiaso lona luasefulutasi o le NRL i togi e 32, sosoo atu ai le Storm, Broncos, Rabbitohs (28).
O le Aso Toonai i lana taaloga ma le Cowboys na toe manumalo mataina ai e 32-18 ma o le alo iloga o Samoa ia Krisnan Inu na sikoa faapea le ova uma foi o ana kiki e lima i le pou.
E le gata i le lelei o lana taalo i soo se vaega a ua ave uma i ai le faatuatuaga o le faiaoga ia Des Hasler lea na siamupini ai Manly i le tausaga talu ai.
O le sefululua masina talu ai na matuā pagatia ai Krisnan Inu i le toso faapautolo o ana konekarate mai Parramatta agai atu i Aukilani mo le Warriors.
O le taimi nei o se auupega malosi Krisnan i le Bulldogs, ma o taaloga uma lava e faia ai lava ana faaaliga mataina.
O loo faafeasoai lelei ma le susuga ia Frank Pritchard, Martin Taupau, Tim Lafai faapea Sam Kasiano o loo manu‘a.
O Krisnan i le laina i tua ua tele ai ni avanoa o le fulupeki matautia ia Ben Barba e sao mai ai i totonu o osofaiga e pei o le taaloga ma le Cowboys lea na kolosi faatolu le laina sikoa. I lana taaloga i le Aso Toonai, e tolu sikoa uigaese na maua e Ben Barba.
I le tau faaiuiu o le tauvaga o loo iai nei ua pei ai lava ua leva ona fesootai Inu, Barba, Morris ma Perret i taimi o taaloga.
Ua tau faatusatusa i le taimi mulimuli na suipi ai le Bulldogs (2004) o le taimi lea na matuā atagia ai foi le toatele ma le talenia o tama Samoa i lea tausaga ia Sonny Bill Williams, Nigel Vaganā, Reni Maitua ma Roy Asotasi.
O loo faatalitali nei se vavega e ono toe malosi vave ai le alii taalo malosi ia Sam Kasiano e toe taliu ai mo le au a o lei faia taaloga faaiu o le suega siamupini 2012.
Afai e toe manumalo le Bulldogs, o le a faigofie ai le mau i luga o le Polokalame Samoa Sportstar Show i Sini i le FM89.3. O le Mau e faapea, ‘O le fofo o le fitu tausaga sosoo o faiaina lava NSW ia Kuiniselani, o le filifili lea o ni tama Samoa lelei i totonu o le aufili a le Blues mo le State of Origin i le tausaga fou.
