O le malaga lea na agai ai Samoa i Saina i le tausaga na tea nei na foi mai ai le au faioloa ma se tala fiafia. Ua iai le manaoga o nisi o atina‘e i lea atunuu e avatu i Samoa nei le honey. E mafua lea tulaga ona e leai ma nisi vailaau poo ni pauta faaopoopo o tuu i totonu o lea oloa ua avatu i lo tatou atunuu.
O Niu Sila foi ma le maualuga o le fua ua agai i ai le lelei o lea oloa pe a fia faatau atu i ai, ua tulai mai ai se feeseeseaiga ma Ausetalia lea sa tele lana honey na faatau mai ai ona o le mau e tele vailaau faaopoopo o loo tuu i le honey mai Ausetalia.
O lona uiga ua tatala nei le avanoa i sui e to‘a 7 o loo iai nei. Na amata faavae mai le asosi o i latou e aoina le honey ma ua fai faatoaga ua faapea ona iai lagomeli e to‘a 60 na iai ae ua tele ina faamaamulu nisi ona o le leai o ni meafaigaluega e faatino ai lea foi atina‘e ma o le vaitau lea e lei lelei mai se maketi mo le aoina i ai o le honey se‘i vaganā ai lava faleoloa i totonu o Samoa.
O le faamatalaga a le sui o le Asosi o faifaatoaga lagomeli o Leicester Dean o se alii papalagi ua tele tausaga o nofo i Samoa, o le faafitauli tele lava o le lē atoatoa o meafaigaluega e faatino ai. E lē fiafia foi le tele o faifaatoaga Samoa e faatino lea atina‘e ona e fefefe nisi i lagomeli.
E ui i lea o loo iai foi se isi asosi o faifaatoaga lagomeli i Samoa ua faatino lava a latou galuega ma o loo faauluulu ai le susuga Raymond Voight. O le faafitauli la lea ua tulai mai ona pau lea o le oloa o lea ua amata faasaga atu malo i fafo e opogi ai Samoa ae e lē taitai lava le honey o aoina e faatau atu i fafo i masina taitasi.
O lea la ua talosagaina ai e le Asosi o loo iai Dean le Malo e tagai ane i fesoasoani mo faifaatoaga e iai le manaoga e amata nei ituaiga atina‘e. Ta‘ua e Dean e lē taugata le faatinoga auā o se faasee e mafai ona fau ona tuu ai loa lea o nofoaga poo faamoega o lagomeli. E ala ona fau le faasee ina ia mafai ona faapaolo ai ia faamoega.
E lē gata i lea e tele isi oloa e mafai ona maua mai i faamoega lagomeli nei. E laititi foi le tupe alu i le faatinoga o ia atina‘e se‘i vaganā ai lava lavalava e faia i le taimi e aoina ai le meli poo le honey.
O le faamatalaga a lenei alii o le tele ia o le tupe e tatau ona maua mai i lenei oloa ma o le aogā o le tele o le lagomeli e fesoasoani ai i le galuega o le fafagaina o laau ma o le tele o lagomeli o le mautinoa foi lea o le lelei o fuga o laau ma le ola o le siosiomaga.
O afā na aafia ai Samoa na faatamaia ai le tele o nei meaola ae o le fausia o nofoaga e puipui mai ai o le a mautinoa ai lava le faaauau o nei atina‘e.
O Niu Sila ma Saina i le taimi nei ua amata nei ona faatau atu le meli mai le kamupani o le CCK. O le tropical honey le pisinisi a Dean ma o loo ia ave le faamuamua i le maketi i Samoa nei lea o loo faatau ai fagu meli poo le honey.
O le manaoga o lenei faifaatoaga ina ia mafai ona unai faifaatoaga Samoa auā o le taimi lenei e alumia le oloa lenei mai i Samoa auā o Samoa le tasi o atunuu e lua i le lalolagi ua faamautu mai i suesuega le leai o ni siama e ono lepeti ai le gaosiga o le meli.
O le mafuaaga lea o le vaavaai mai o Niu Sila i Samoa nei, o le mafuaaga foi lea o le unai o Saina ina ia alu atu sa‘o i Samoa lana meli. O seleni e amata ai ona faatutū faamoega o loo talosagaina mai i le Malo, e lē gata i lea o le seleni mo taavale e faaaogā auā le aoina o lenei oloa ma le faamautu ai loa o uta e ave i fafo i lea masina ma lea masina.
“O lea ua tatala mai le maketi, ae o lea foi ua lē lava le oloa e ave ma o le maketi lea e i Saina e mautinoa le tele o le tupe maua a Samoa e sau ai,” o se saunoaga lea a lea alii.
