‘afai o lagona na ua taugata le taliga o tatou, o le latou lena faitalia,’ Vaasatia P Komiti
Ua taumafai le komiti o polokalame o le Fu‘a a Amerika Samoa e saili ni seleni e faatupe ai le faamanatuina o lea aso taua i le talafaasolopito o le teritori, ma ua iai ma se lagona e le tatau ona toe faafiafia nuu ma afioaga mai Samoa Tutoatasi ona ua taugata tele le faatupega e nuu o Tutuila e api ai.
O se lagona lea na laga i se fono a Pulenuu o Tutuila ma le faauluuluga o le ofisa o mataupu tau Samoa, ona ua aapa lea ofisa e faatino se suegatupe e ala i se lulu (raffle) e le o lagolagoina uma e Pulenuu o nuu ma afioaga.
Na taua e se sui pulenuu i le fonotaga o loo mafai lava e Tutuila ma Manu‘a ona saunia polokalame o le Fu‘a i faafiafiaga i siva ma pese faaleaganuu ae aua nei toe malaga atu ni nuu mai Upolu ma Savaii ona e taugata le taliga.
Na tapa se finagalo o le Pule Sili o le Matagaluega o le Palemia ma le Kapeneta le afioga Auseugaefa Vaasatia Poloma Komiti e tusa o lea tulaga.
“O le mea moni lava ia o latou e aumaia le valaaulia mo ni nuu e malaga atu, ona silasila lea o le kapeneta pe talafeagai a o ai foi nuu ma afioaga e ave i ai le tapenaina o ni faafiafiaga”, o se finagalo o Auseugaefa.
Na ia faamatala foi e faapea a malaga nuu ma afioaga e iai ma le fesoasoani a le Malo e faatupe ai pasese o aumalaga e oo le maualuga i le 250, ae a sili atu loa ona totogi lea e le tagata o loo ova ai le aumalaga mai le 250 o lona lava pasese.
A malaga mai ni nuu ma ni afioaga i Tutuila ma Manu‘a e valaaulia mo faafiafiaga o le Fu‘a o le Malo Tutoatasi e leai se fesoasoani e avea i ai e le faigamalo a le teritori e pei ona saunoa mai le Pule Sili.
Afai ae le toe iai se valaaulia e aumaia mo isi Fu‘a o le lumanai a Tutuila, na saunoa Auseugaefa e lelei foi lea o le a faasaoina ai tupe a le Malo Tutoatasi, ae na ia faamanino atili, e le o se manao o Samoa Tutoatasi e mafua ai ona malaga nuu ma afioaga, ae o le finagalo o le faigamalo i Sasa‘e.
“E pei lava o le lagona masani, a iai loa tatou e pei ua atoa tino o Vaatausili i polokalame o le latou Fu‘a, ae afai o se lagona lena ua taugata le taliga o tatou, o le mea lena e tuu i le latou faitalia”, o se isi lea faaopoopo mai o le Pule Sili o le Matagaluega a le Palemia ma le Kapeneta.
O le tausaga nei e lei malaga mai ni aufaafiafia mai Tutuila aua sa ave i ai le valaaulia mo ni afioaga se lua ma so latou fautasi.
Peitai o le puupuu o le taimi e tapena ai le mafuaaga na le mafai ai ona faatasi mai.
O le fautasi sa valaaulia sa le mafai foi ona auai i tuuga fautasi o le Fu‘a a Samoa Tutoatasi o lenei tausaga, ona sa faailoa mai e Tutuila e fia tausinio le fautasi lea i le tuuga o le Teuila o le tausaga nei.
E lei faailoaina mai i le polokalame o le Teuila poo taunuu ona malaga mai lea fautasi mai Sasa‘e.
