E ono avea o se tulafono tumau se pili poo se tulafono taufaaofi, sa tuuina atu e le tamaitai faipule o le vaega faaupufai a le ACT, o Heather Roy.
E talitonu nisi faipule, e aogā le iai o se tulafono e puipuia ai nisi o alo ma fanau i totonu o aoga maualuluga e pei o iunivesite, lea o loo tau tulai mai ai le faafitauli o le faamalosia ina ia auai atu i asosi a tamaiti aoga.
O le ogatotonu o le masina lenei o Oketopa ua tuu mai i ai le faitauga faalua o lenei tulafono taufaaofi, ae ua pasia lona faitauga muamua i totonu o le Palemene.
O le autū o le finagalo o le tamaitai faipule e pei ona tuuina atu ai lenei pili, ina ia maua e fanau aoga le saolotoga e filifili ai pe fia auai i se asosi a tamaiti aoga pe leai.
Ta‘ua i se pepa o faamatalaga o lenei mataupu, na faailoa e le tamaitai faipule, o le taimi nei o loo tele ina faamalosia fanau aoga e auai i asosi nei a tamaiti aoga pe afai e mananao e faaleleia a latou aoga, ma o i latou foi na e faamalosia le auai atu i iuni, e ui lava e lē o lagolagoina e le toatele o nei tamaiti nisi o manatu poo mea o loo uunaia e na asosi.
O se faataitaiga o nisi taimi latou te tutū faatasi e faaali ni lagona tetee i nisi o mataupu faapolokiki a le Malo e ono afaina a latou aoaoga.
E lē o lagolagoina e le Labour ma le Greens lenei pili, ae lagolago malosi i ai le National ma le ACT. O le manatu o le fofoga a le Labour mo le matagaluega a aoga, Grant Robertson, afai o le a tuu i le faitalia a le tama ma le teine aoga, lona uiga o le a lē toe maua e ia se lagolagosua poo se fesoasoani lea e masani ona maua mai le asosi pe a tulai mai ni faafitauli na te moomia ai lea auaunaga a le asosi. Fai mai Robertson, afai o le a pasia lenei pili, o le a faigata ai mo le asosi ona toe maua vave nisi o latou sui auai pe a toe amata aoga, aemaise o taimi tonu na e moomia ai tele le lagolago malosi a le asosi mo le momoliina o ni o latou manatu e tusa o le taugata o pili aoga ma isi mea totogi i totonu o aoga.
Fai mai le sui o le Labour, afai e pasia e avea ma tulafono tumau lenei pili, o le a tuuaia lava le National i lo latou taumafai e titina i lalo tomai (quality) o fanau aoga lea e faaalia i soo se mea latou te faia, e pei foi o a latou mataupu fai i totonu o asosi faapenei. Ma ua folafola le sui o le Labour, afai e toe pale mai latou i le pulega o le Malo, e toe talepe uma lava lenei tulafono.
O loo tālia nei la se iuga o le faitauga faalua o lenei tulafono taufaaofi i le Palemene.
