O se manatu lea na faaalia e le Faatonu o le Nofoaga tutotonu i Victoria Ausetalia mo Tusitala ma le tali atu i le feagaia ai ma faalavelave matautia e pei o le galulolo i Samoa.
O se nofoaga lenei o loo i totonu o le Aoga Tusitala i le Iunivesite o Columbia i Victoria Austalia ma na malaga mai i Samoa le Faatonu lenei o le tamaitai o Cait McMahon ma se alii tusitala Niu Sila ua tele tausaga o ia saunia lipoti mai i nofoaga o loo vaaia ai fetauaiga i soo se itu o le lalolagi.
O le la fesoasoani o le faatalatalanoa lea o tusitala, tagata faasalalau ma pueata na galulue uma i le aoina o faamaumauga, pueina o ata ma faatalatalanoaga o lenei faalavelave tele na feagai ua aafia ai Samoa talu mai le aso 29 o Setema (taimi Samoa).
“O le tele lava o tagata e manatu o Tusitala ma Pueata a tulai mai se faalavelave o le latou galuega muamua lava o le faasalalau ma e leai lava se tasi e manatu e ono aafia tagata nei i vaaiga o loo feagai ma i latou i aso uma,” o se faamatalaga lea a le tamaitai o McMahon.
“O le fesoasoani la lea ua ofo atu i sui nei o loo faaauau pea le galuega i Samoa, o le faatalatalanoa lea o vaaiga ia ua manatua pea ma o nisi ua taua e McMahon ua tele aafiaga latou te le o iloa ua maua ai ona e le o iai lava se taimi e nofo lelei ai i lalo ma lagona le matautia o nei vaaiga,” o se tala lea a lenei tamaitai.
“O aafiaga o tusitala ma pueata, o le le mafai ona momoe, ua le fia talanoa nisi, ua maitaita ma le lelei ai ma le faatinoga o galuega, o nisi nei o aafiaga o vaaiga nei e feagai pea ma nei tagata, ae o le faafitauli e le o iai lava se tasi e manatu o loo iai se faafitauli ona o loo pisi e tau saili lipoti o lea aso ma lea aso ma o le taumafaiga lenei ua aoao ai faauluuluga o ofisa faasalalau ma nusipepa ina ia iloa auala e mafai ai ona aveese mafatiaga nei e feagai foi ma nei tagata, ae faaleleia atili ai le latou auaunaga,” o se faaaliga lenei a lea tamaitai.
Na taamilo McMahon ma Jon Stephenson i ofisa faasalalau ma nusipepa o le atunuu ona o le manaoga e faatalatalanoa uma le toatele o tusitala ma sa iai lava isi ofisa e lei maua lenei fesoasoani ae o aoaoga ua faatautaia mo sui o le Asosi Tusitala o Samoa ua faaalia e McMahon o le a mafai ai ona faalautele lenei faamoemoe.
I Samoa lava ia e le masani ona iai fesoasoani faapenei ma o le faafetai lea a le Peresitene o le Asosi a Tusitala i Samoa i le faaiuga o lenei taumafaiga, ona o lea ua manino ai foi le tele o ofisa e galulue ai tusitala i le manaoga e faatalatalanoa mataupu ogaoga e feagai ma tusitala ma pueata ina ia mautinoa e le tulai mai ai ni tulaga e faafaigata ai le faatinoga o galuega faatusitala ona o le leai o se fesoasoani faapea e maua.
Faaalia e McMahon o le vaaiga lava lenei i soo se nofoaga ua ofo atu i ai le latou fesoasoani, o tali e tuuina mai e tusitala ma tagata faasalalau aemaise o pueata ua manino ai e oo lava ia i latou e le o manatu mamafa i aafiaga e pei o faalepo o loo faaauau ona maua ai nisi ma le le mafai lava ona moe.
Ua iai le manatu o i laua nei e taua tele le faaauau o nei faatalatalanoaga, pe na o le talanoa lava i faafitauli aemaise faalavelave tetele e lipotia e tusitala ua lava lava lea e faamautu ai ua iai se galuega ua faatino e aveese malie ai mafatiaga o lenei foi auaunaga mai i le feagai ai ma faalavelave matautia o loo latou lipotia ma fofogaina atu i le atunuu i aso taitasi.