O le vaiaso tonu o le tumutumu o le aai o Melepone ona o le Ipu a Melepone, ma o le vaiaso puupuu i galuega, ua masani ai foi le mamalu o tagatānuu o le aai, o le vaiaso foi lea o feiloaiga ma aiga aemaise o tafaoga. O le Aso Toonai tonu foi lea, aso 10 o Novema, na faamanatuina ai le lima sefulu ma le ono 56 tausaga o le soifua o le tamā ia Taipisa Ulugia. O le susuga ia Taipisa e alaala ma nofomau i le aai o Sini, peitai na malaga asiasi ai i tauaiga o i Melepone.
Na avea le asiasiga a le tamā mai Sini na mafuta faatasi ai lona auaiga ma faatumulia ai le maota o le afioga ia Taiivao Afasene i Glayton i alo ma fanau a le auaiga o Ulugia Filipo mai le afioaga o Vaiusu. E lē gata o le aso fanau, ae o se feiloaiga matagofie e lē masani ona maua ma tauaiga mai isi setete. Na maualuga le viiga o le Atua, ona o le aso ua ula ma ua maualuga ona o aiga sa vao eseese ae ua fuifui faatasi ona o lana pule faasoifua, ae le gata i lea, ua uluola ma faamanuiaina le aiga e ala i alo ma fanau ma a latou fanau, o saili malo i Ausetalia. Ia manuia alo ma fanau a le aiga.
