Na matua faateia le vaai ma le mafaufau ina ua tupu lenei faalavelave o i totonu o le atunuu pele. O le Aso Tofi 13 o Tesema na matou malaga atu ai i Mulifanua mo le agai atu i Salafai ae na faafuaseia ai le agi malosi mai o le savili ma faasolo ina avea ma matagi malosi i lea taeao.
E ta lava le valu e lei taunuu mai le vaa o le ono mai Savaii. Sa nofonofo pea ma faatalitali poo le ā se mafuaaga, peitai ua toe logoina mai le tapunia o le alavaa ona o le sou ma le matagi ma toe foi uma loa taavale a tagata i o latou aiga.
Sa lapataia mai e le leitio le atunuu ina ia o i nofoaga maualuluga ona o lologa aemaise matagi malolosi o le a afaina ai Samoa. O le Aso Lua ma le Aso Lulu lea, ae na faataunuuina ia valoaga a le Ofisa o le Vaaitau i le Aso Tofi, 13 o Tesema. Talofa i le faafuaseia o le lia‘i malosi mai a Eveni ma faatama‘ia ai le siosiomaga lanulau‘ava o le taulaga i Upolu.
O laau totō ua lia‘ina; o fa‘i ma ‘ulu ua fati i lalo tumutumu a o isi laau ua suati i luga ponati ma a‘a. O le tele o pou molī eletise ua pa‘u‘u ma lafoia i luga o le auala tele. O uaea eletise mai ia pou ua na ona fola vave ai le ala ma siosiomaga o le aualatele. Ua le mafai ona toe feoai taavale o le itu na iai i matou.
O lumafale o lo matou fale e iai le vaitafe ae na pa mai le tane tele (reservoir) e i tua atu ma e mamao teisi atu i tua o matou.
O le taimi na tatafe ai tafega mai tane tetele ia faapea vaitafe o loo tulata i fale o aiga, o le taimi lena na matuā ese ai le faigata o le vaai atu ua tafefea mai masini tamea, o ogaumu, o taavale, laulau, nofoa ma le anoano o meafale aogā a nai aiga ua tafefea atu nei i le loloto o le moana ma ua faaleagaina.
O se vaaiga uigaese le sau o le tafe o le lolo e lanu enaena ae oo ina ua te‘a le suavai ae to‘a mai le palapala matuā uliuli pato‘i ma to‘a mafiafia i luga o le eleele faapea ma totonu o fale na sao i ai le lolo.
Na aumai le tala mai niisi o le tupulaga ua ala ona maliliu isi ona ua tafefea i le tafe, talu ai le taaalo ma faasee i luga o taavale na tafefea atu i le lolo.
O le masani lea a o tatou tagata, e fia iloa le ‘au o le paipa ma lē usitaia ai poloaiga a le Ofisa o le Vaaitau ina ia o i mea maualuluga, ae o taaalo i mea e lamatia ai le soifua.
Na vave lava ona lagona le tepa a‘e i le lagi ma faapea atu: “Pule oe i matagi”. Ioe o lagona ia na oso mai, auā o le Pule lava ia o nei galuega ofoofogia ma mala faanatura, o lo tatou Atua lea. Ia tatou tatalo pea mo si o tatou atunuu ma nai tagata ua leai ni nofoaga faapea i latou ua amia o latou aiga i le afā sauā o Eveni. A tomanatu i ai e lagona pea le mafatia.
