O le a manatua pea e lo tatou atunuu se tasi o tamalii lauiloa i upufai i faigamalo a Samoa ona o lona sao tāua ma aogā a o tulai mai e avea ma Minisita o le Soifua Maloloina i se tasi o paeaiga a le Palemene.
O le faatūina o le falemai faamamā toto ma le faalapotopotoga o le gasegase o fatuga‘o le Samoa Kidney Foundation, o se tasi lea o fuafuaga tele a le Malo sa lotolotoi ai le tofa Mulitalo Siafausa Vui a o avea ma minisita.
O le faatūina lea o lea auaunaga e le Malo ona o se taumafaiga e faasaoina seleni i le auina atu i Niu Sila o le mamalu o le atunuu ua aafia fatuga‘o e togafitia ai ma faamamā ai le toto. O le taulamua o le tofa Mulitalo i lea fuafuaga a le Malo na iu manuia ina ua faatūina le falemai e pei ona iai nei i le nofoaga sa iai le maota o alii ma tamaitai tausi soifua sa faamautu ai le nurses home.
E lei faigofie lea atinae a le Malo ona sa faia feutanaiga ma nisi o faalapotopotoga ma Malo i fafo e fesoasoani i le faatūina o se falemai faamamā toto.
O le Faalapotopotoga faavae o le gasegase o fatuga‘o a le atunuu o Sigapoa na latou fesoasoani ma aumai masini ma fomai popoto faapitoa i le amataina o lea tautua fou faalesoifua maloloina i lo tatou atunuu.
I na ua mae‘a ma amata faaaogā, sa mafai ai loa e nisi o tamalii ma failauga faapea faletua ma tausi ma le lautele o o tatou tagata sa nonofo ma aumau i Niu Sila mo togafitiga ona malaga mai i Samoa ma toe faatasia ma fanau ma aiga, ina ua iai le falemai e faamamā ai le toto o i latou ua aafia fatuga‘o.
O se tasi lea o atinae tele a le Malo o le a manatua ai pea le tofa Mulitalo a o avea ma Minisita o le Soifua Maloloina.
O le afiafi o le Aso Sa na tea nei i le maota gasegase o Tupua Tamasese Meaole i Motootua, na tuumalo ai lea tamalii i se gasegase e faapea mai se molimau o se tausi soifua, o le fatu.
Sa taofia o ia i le falemai mo togafitiga ma toe tea ai i tua ua maua se faasiliga malosi, ae o le afiafi o le Aso Sa a maliu ai, na toe faanatinati atu ai i le maota gasegase mo ni togafitiga.
O loo taoto nei lona tino maliu i se tasi o maota maliu e tapena ai ona aiga ma ona alo mo ona toe sauniga i se taimi o le a fofogaina mai, aemaise foi o le tagi mai ala o nisi o le fanau, aiga ma uo aemaise o uso ma tuafafine.
A o avea o ia ma faipule o le itumalo o Faasaleleaga Numera 4 sa avea o ia ma minisita o le kapeneta, avea ma sui fofoga fetalai i se tasi o paeaiga, ma sa avea foi ma Uipi poo se tofiga i le vaega faaupufai o le HRPP.
Ia faamaise le agaga faamafanafana o le Atua i le nofo a alo ma aiga uma aemaise o uo ma aumea mamae a le tofa Mulitalo Siafausa tainane le tapuaiga a Samoa aoao latou te silafia lelei le sao aogā ma tāua o lea tamalii lauiloa o le tatou atunuu.
