O le alii Samoa o Siuleo Vitale, e mautinoa lava na matuā faateia ai le maimoa ma le faafofoga a tagata uma i Niu Sila, ina ua tulai mai i le faatinoga o lana taleni pese i le New Zealand’s Got Talent, e matuā uigaese le malosi ma le matagofie o lona siufofoga, a o tagitagi i le usuina o ana pese i lenei tauvaga tele a Niu Sila.
O Siuleo ua 35 tausaga o lona soifua. E toatolu ona alo, ma o le tausaga e 2008 na faimalaga mai ai ma si ona toalua ma le la fanau mai Samoa, ona o le fia sailiili lava i se lumanai manuia mo ia ma lona aiga, aemaise lana fanau ina ia lelei a latou aoaoga.
O loo faamautu nei i latou i Glenfield, ma e galue ai iina Siuleo i le kamupani a le Bunnings Warehouse i Glenfield, o se tasi na te faafeiloaia tagata faatau e agai atu i lea faleoloa.
E ta‘u mai lava foi i le galuega a lenei alii, o se tagata e iai uiga matagofie e faigofie ona tosina fiafia atu i ai tagata, ma sa iloga mai foi na uiga ma foliga fiafia o lenei alii i le po na tulai ai luma o faamasino o le tauvaga ma faataalililili mai lona siufofoga malosi i le usuina o le pese a le aliipese o Tom Jones, le pese i le tamaitai o ‘Delilah’.
O le malaga mai a le aiga i Niu Sila, e lē gata ina taulai i le faamautuina o le aiga ma le fanau i se tulaga lelei i lenei atunuu, ae sa laualuga ai ma le moemitiga a Siuleo, o se avanoa lelei lenei o le a atili faalautele ai lana taleni e pele ia te ia, o le pese.
I se faamatalaga a lenei alii ina ua maua se avanoa e talanoa mai ai i le sui o le Radio Samoa, na saunoa ai Siuleo, o lona lava olaga mai a o laititi, o lana lea mea e fai o le pese ma le faafiafia, aemaise e tele ina pese i totonu o aufaipese a le latou lotu.
E lelei le siufofoga, ae matuā lelei foi i le taina o le piano e pei ona ia taina ai le piano a le latou lotu, peitai ina ua agai mai e usu lana pese i le tauvaga o taleni a Niu Sila, sa ia faaaogā mai le keyboard a si ona atalii.
O le 12:00 i le vaeluaga o le po anapo na mae‘a ai le avanoa e palota atu ai tagata poo ai o i latou e toalima sa faafiafia i le po le Aso Sa e mananao e faaauau atu i le Grand Final poo le suega siamupini.
Ia talosia le alo atu a sia foi alo o le atunuu, ia tau lau o lona faamoemoe ma le sini ua leva ona moemiti i ai.
Ae pau le itu ua mautinoa, na matuā faateia lava faamasino, e latou te lei faatalitalia o loo iai se isi uso o Tom Jones sa soifua ane i Samoa, ae o lea ua faafiafia nei i le sailiga taleni matautia a Niu Sila. O ou māmā na Siuleo, ma talosia ia malosi pea le siufofoga o le alii e faaauau ai sona tulaga lelei i le tauvaga.