O le saunoaga a le taitai o le Itu Agai le Labour, Lilomaiava Phil Geoff, i se feiloaiga ma tagata lautele o le itumalo o Magele, sa ia faamanino ai, o lona naunautaiga faapea ai ma le vaega faaupufai, o le toe faafoi o le atunuu i tagata o Niu Sila lava.
O le Niu Sila sa iai i tausaga ua mavae, o le Niu Sila foi lena o loo manao ina ia toe faafoi i ai le atunuu ma ona tagatānuu.
E tele itu sa ta‘ua e Lilomaiava e faatino ai lea manaoga, ma o loo galulue malosi i ai, ina ia taunuu ai le faamoemoe o le toe maua o auaunaga taugofie, ma le puipuiga o tagata lautele o le atunuu.
E tatau ona avea Niu Sila o se atunnuu saoloto ma maua ai le soifua maloloina, o le soifua laulelei ma le ola fiafia.
O tapenaga ia o loo tulituliloa ma taulai i ai fuafuaga a le Labour, pe afai ae toe filifilia i le faiga palota tele a le atunuu.
O le afiafi o le Aso Gafua na tea nei, aso 22 Aukuso, na faataunuuina ai se feiloaiga a le alii faipule o Magele, le Tofa Su‘a William Sio ma tagata lautele o lona itumalo i Magele lava.
O le feiloaiga sa faatautaia lava e le alii faipule, ae sa auai ane ai ma le taitai o le vaega faaupufai a le Labour, Lilomaiava Phil Geoff, faapea isi sui e toalua.
O le taitai lava o le Itu Agai sa saunoa i le saunoaga autū, ma faamalamalama i tagata lautele fuafuaga ma polokalame o loo tuufaatasia mo le lumanai o le atunuu.
Auaunaga Soifua Maloloina ma Fomai (Heatlh Sector)
O le tulaga lea sa laualuga i le finagalo o le taitai o le Itu Agai, ma sa ia ta‘ua o lona manao ma le finagalo o le Labour, ia avanoa ma ia taugofie auaunaga mo le soifua maloloina i soo se vaega o le atunuu.
E lē gata ia taugofie, ae ia faateleina ina ia mafai ona fesoasoani mo tagata uma lava. Ua maitauina le faigata ma le taugata tele o falemai ma fomai ma isi auaunaga talu ona tulai mai le National, ma ua avea o se faafitauli numera tasi lea mo aiga e vaivai le tupe maua. Sa ia talanoa ma feiloai i le tele o aiga ma fanau, sa manaomia tele togafitiga mo le soifua maloloina, peitai ua lē gafatia ona o le taugata o pili e totogi.
Fale o le Malo (Housing NZ)
Saunoa Phil Geoff, ua matuā nofonofo lelei lava le malo o loo iai nei, ua lē gaioi e toe fausia nisi fale mo tagata lautele. O se tulaga lē manuia tele lea, ona e foliga mai ua lē amanaia e le National manaoga o tagatānuu.
Ua na o le fausia o isi polisi (policy) fou e tutuli ese ai tagata mai fale, ma soona tulei e faatau fale ona manuia ai lava lea o tagata maumea auā e gafatia mokesi, ae ua lē fausia nisi fale fou e agai i ai tagata o loo fāi mai, e amata ai le soifuaga i totonu o le atunuu.
Aoga (Education)
E tatau ona matuā amanaia Aoga Amata (Pre-School) ma aoga maualalo, auā o le amataga lea ma le faavae o le olaga a‘oa‘oina o soo se tama ma se teine, atoa alo ma fanau laiti. Ia faateleina alaga‘oa, ma ia saga faateleina foi a‘oa‘oga talafeagai mo faiaoga ina ia mautinoa e agavaa ma ave a‘oa‘oga tatau mo fanau.
O fesootaiga ma le toe silasila i nisi auala mo le saga faaleleia o a‘oa‘oga. E lē tatau foi ona ave nisi ma tapu‘e na o isi tagatānuu ae faatauvaa ma vaai maualalo i isi tagata ma isi atunuu. Ia tutusa tagata uma i le tulaga ma le faatinoina o a‘oa‘oga i le atunuu atoa. E matuā teena e le Labour le toe aveesea ma taofia o fesoasoani a le malo sa ofoina mo aoga a le Pasefika.
Mativa ma ē vaivai ma le ‘au maumea (Poorer vs Richer)
Saunoa Phil Geoff, e lē fia vaai ma e lē manao foi e tupu i Niu Sila, nisi o vaaiga ma mea o loo tutupu mai i atunuu i fafo. O Niu Sila ia avea o se nofoaga saogalemu e pei ona talitonu i ai le vaega faaupufai ma lona tagata. O le mafuaaga o nisi o vevesi e pei ona tulai mai, e mafua i tupulaga talavou, ma o le isi lea tulaga e tatau ona ave i ai le faamuamua. Ia lagolago ma talanoa i tupulaga ina ia faasoa lagona ma manatu, ma malamalama i manaoga o tupulaga.
O le fia‘ai ma le saili taumafa, o le isi mafuaaga o le talepe fale ma le gaoi i totonu o soo se atunuu. Afai e faatupulaia le ola mativa ma le fia‘ai, o le a faateleina foi le tuinanau e mafua ai le gaoi ma le uiga leaga o le faomea, ma e ono oo ai lava ina lepetia le tele o meatotino a le malo ma le tagata lautele. E iai ma nisi vaega o loo naunau i ai le vaega faaupufai a le Labour ina ia faaleleia ma fesoasoani ai i tagata lautele o Niu Sila, ina ia faatumauina le avea o Niu Sila ma atunuu lelei i le tamaoaiga ma ia tele galuega, faapea ai ma lona saogalemu.
