Na matua faatumulia le faletalimalo tele o Kalaiesetete i matua, aiga, uo ma e masani aemaise le auvalaaulia lea na latou molimauina le faauuga o alo ma fanau a le Pasefika ina ua iu mai i le Iunivesite o Canterbury ma o latou faailoga, lea la sa faia ai se sauniga faapitoa ma se talisuaga tele ua taua o le University of Canterbury Pacific Awards.
E tusa ma le 27 alo Samoa na faamanuiaina mai le fuainumera aofai e 34 o tamaiti Pasefika, ma o se mitamitaga lea i le mafaufau ona o le faatupulaia pea o alo o le atunuu o loo finauina le poto ma le atamai i totonu o Iunivesite.
Na uluai amata le sauniga i le faaulufale mai o le au faauu i totonu a o taina le pate ma le lali, a o faapena ona tutulai le auvalaaulia, ma o se vaaiga fiafia ma le manaia i le silasila a le mamalu o le atunuu na aofia i lena po.
Na sosoo loa ma le sauniga lotu puupuu na saunia e le susuga i le alii faifeau Pastor Iliafi Esera mai le ekalesia Assembly of God i Wanganui, lea na ia faamamafaina ai i lana saunoaga e faapea, ia le gata ina toaga e faitau ituaiga tusi faitau eseese mo le poto salalau, a ia sili ai ona poto e faitau le Afioga Paia a le Atua e maua ai le poto sili.
O le alii o Faamanu Telea sa fai ma fofoga o le po, ma o ia foi e galue mo le Pacific team i totonu lava o le Iunivesite, ae o se tamafanau agavaa tele i lona tiute sa feagai ai.
O le faatautaia o lenei faamoemoe atoa ma lona faagaioina sa feagai lea ma alo o le atunuu o loo iai i totonu o le komiti o alo Pasefika i le Iunivesite, ma o loo taitaia e le faletua o Liz Keneti ma lana au lagolagosua.
O le tufatufaina o faailoga ma le faamalo i tamafanau faamanuiaina sa tauaaoina e le Chancellor o le Iunivesite ma ia saunoa ai i le alualu i luma o le taumafai o nei alo, e ala i soo se faailoga ua ausiaina. Ae na matua faafofoga ma le totoa le au valaaulia ma matua i lauga pupuu faafetai a fanau faauu i lea po, ma sa faagaeetia ai lagona, vaaia foi loimata maligi e le gata i matua ma ē na auai, ae o fanau foi ona o le faamoemoe sa tauasa mai ai i tausaga e tele, lea ua taunuu i le manuia ma le fiafia.
O le lololo ma le suamalie o le po, na faatalitali uma le aofia i le saunoaga faafetai, faalaeiau, faamalo mai le malo faapitoa ma le faaaloalogia e pei ona valaaulia ai le Afioga i le alii Faamasino mai le Faamasinoga Maualuga i Samoa, Judge Vui Clarence Nelson, na ia saunoa ai e faapea “Aua lava nei masalosalo se tama poo se teine aoga i lona mafai na te suia ai lona olaga aoaoina, e ao foi ina togi ifo ma togi ane le luitau ma faapea ane, ou te mafaia ona suia le lalolagi i ni suiga lelei”.
O ni upu faamalosiau ma le faatupu lagona e luitau ai pea le ola taumafai i aso uma, ma sa le pine ona tutulai i luga le au faauu ma le valaaulia ma patipatia le suamalie o nei upu faalaeiau.
O le afioga foi i le Faamasino, Vui Clarence Nelson sa faauu atu i lana faaloia i Canterbury, sosoo ai ma le isi ona alo tamaitai, o lea foi la ua lona tolu ai i lona afafine laititi le faailoga faaloia i totonu o lona lava aiga mai le Iunivesite o Canterbury.
Na maea lea, ona alo atu lea i le taumafataga tele na saunia ma maimoaina ai nisi o faafiafiaga sa iai i lea po, le matagofie foi o le tatagi o patē ma lali mai le Atu Kuki, ma ua atili lauiula ai lea po fiafia.
E faamanuia atu ai le tatou nusipepa i alo uma ma fanau a le Pasefika ua faamanuiaina i lenei foi tausaga, ma faafetaia ai foi le galulue ma le lagolago malosi a le Pacifica Advisory team i totonu o le Iunivesite o Canterbury.