Ua faailoa e le taitai o le Malo i sona finagalo ua lipotia faalauaitele, le lima malosi o le Malo o Saina e ala i fesoasoani a lea Malo tele i le atina‘e o Samoa.
Faaalia e le Palemia o talosaga a le Malo o Samoa ia Saina e fausia fale tetele, ma fesoasoani i le atina‘e o taaloga e mafua ona e lē mafai e isi malo ona faatino ia vaega ona e lē lavea ia latou polokalame fesoasoani.
I le faatusatusaina o le pitolaau ma le sao a le Malo o Amerika i le Pasefika, na faaalia e le Palemia susuga Tuilaepa L Sailele Malielegaoi i se tasi o nusipepa iloga i le atunuu, e lē noatia se finagalo faaalia o le peresitene o lea malo malosi a ua tuu saunoa lava e aunoa ma le faalavelaveina, ae a tuu mai loa i tulaga i galuega faatino mo atunuu o le Pasefika, e lē taitai tutusa Amerika ma le Malo o Saina i le tulaga i fesoasoani.
O se tasi lea o malo ua sili ona latalata mai ona sootaga ia Samoa, ma ua pine faamau lea mafutaga mafanafana i le faatuina o le ofisa o lea Malo i Samoa.
Ua faailoa foi e le taitai o le Malo i lea lipoti, sa valaaulia e le Malo i pulega ua mavae Saina ma Taiwan e faatutū ni o la ofisa mo mataupu faalemalo i Samoa, peitai e lei tali mai Taiwan, ae na o le malo o Saina.
Ua na o Saina o loo aloaia e Samoa e pei ona iai le faiga faavae a lea malo o le “one China policy”, ae o Taiwan o se vaega o lea atunuu e ui e tutoatasi lava ana pulega malo ma e faavae foi i pulega faatemokarasi, ae lē tutusa ma Saina o se malo e faavae i pulega faakomenisi.
