E lei tele i se pito le tulaga faananau o alii fusu mai isi atunuu latou te fia lu‘iina le alii o Alex Leapai, e lē o se tagata e mimita pe faalialiavale auā e tumau lona faatuatua o le Atua lava e foai lona malosi. O le po o le Aso Tofi, aso 8 o Tesema na fetaui ai le susuga ia Alex ma le alii o Troy Weida mai Amerika.
E ui ina lē sikuea le aumaimoa ona e lei mae‘a le taamilosaga muamua, peitai na leai se isi na lei faamalieina lana maimoa i le taalo a Alex i lea afiafi o se tamafanau a Kuiniselani ma Samoa atoa. E uigaese le mataina o le tomai o Alex e faatoilalo ai se tasi e fia lu‘iina o ia.
O le taaloga talu ai nei, e na o le tasi le minute ma le 50 sekone ae amata ona niva le alii mai Amerika ma pa‘ū loa i lalo ua fefiloi lalolagi ma le vateatea i lana vaai.
Momoli le agaga faafetai tele o Alex mo le tapuaiga a Samoa e lē gata ia i latou na auai, ae faapea foi ona aiga i Ausetalia, Niu Sila ae sili ai si ona tina ia Leitu ma aiga uma faapea si ona nuu faapelepole o Laulii.
O le Aso Toonai, aso 17 o Tesema o le a toe taliu atu ai i Samoa si ona tuaa ia Faatau‘i Leapai e pei ona malaga mai ai e tapuaia le taaloga faaiu o lenei tausaga. O le faaiuga o le masina o le a malaga atu ai Alex, nai ona uso ma aiga uma auā foi faigamalologa i si o tatou atunuu pele o Samoa.
O lea lava foi afiafi na fusu ai se tasi o alo o le atunuu mai Niu Sila, le susuga ia Junior Pati ma le alii taalo lauiloa mai Tonga o Solomon Haumono, ma e lei faamanuiaina le taumafai o Junior Pati ina ua malolo i le alii Tonga. Na faatumulia i nisi o le mamalu o le atunuu faapea uo ma aiga o Alex Leapai aemaise foi nisi o aiga o le susuga ia Junior Pati.
