O le tamalii iloga o le atunuu i taaloga faipelega le Afioga Toaletai David Tua, sa fai ma malo asiasi o nisi o fusuaga sa faatautai i le aai o Kalaiesetete i le vaiaso na tea nei.
Sa momoli ai le faafetai ma le faamalo a Tuaminator ona o le maualuga o le tulaga ua iai le taumafai a le tupulaga talavou i le faagatama.
Na saunoa Toaletai e aua ne’i faataitai atu se isi ia te ia ae ia sili atu se mea e mafai ona oo i ai lo latou tulai mai, aemaise lava o le alo talavaou o Samoa lea e fai ma sui o Niu Sila i faipelega i taaloga o le Tupulega le susuga a Joseph Parker.
Ae talu ai ona o loo nofo tatali pea le atunuu i se tala lata mai o le faamoemoe o le afioga a Toaletai David Tua, ae poo afea foi o le a toe maua ai sana paga, a o tulituli matagau ai pea sona avanoa i le Fusi o le Lalolagi.
Peitai o le saunoaga manino a Tua na ia faailoa ai e faapea, o le lua vaiaso o lumanai e iloa ai lona lumanai pe a mae’a ona faia lona taotoga i lona tau’au lea na faaletonu i le taimi o le fusuaga ma Berret.
Fai mai Toaletai e lei taitai lava lona malosi ma e tele ana pisinisi e lei mae’a o loo iai e tatau ona faauma lelei, ae o lona malosi ma le agavaa o loo faatupulaia pea, ma e le taumate le ono oo atu lava i le lima tausaga o lumanai o tumau pea lea malosi.
E toatele i latou sa auai i Kalaiesetete na faailoa lo latou fiafia tele ia Tuaminator ma o loo tumau pea le lagolago a le toatele ia Tua, fai mai a latou o Tua lava ia o le Siamupini i Niu Sila nei.
O le a tulimataia pea e le tusitala le tamalii o le atunuu aemaise o lana miti ina ia faataunuuina lona pale i le Fusi.