I le vaiaso talu ai na faato‘ā maua ai e tala i taaloga a le Radio Samoa le faaopea ai o le magala masii mai Samoa, a le Kolisi maualuga a le Ekalesia EFKS a Nuuausala mai Nofoalii i se latou malaga taamilo mo ni taaloga lakapi ma nisi o kolisi maualuluga i Aukilani nei.
I se feiloaiga ma le taitai Malaga, o ia foi o le pule aoga a Nuuausala le susuga ia Rev. Fuatimu Posese, na ia matuā faafetaia ai le Ekaleisia Aoao ina ua mafai ona taliaina se faatalosaga mo sina avanoa e faataunuu ai lenei malaga, auā lava le vaavaai mamao i tupulaga o le atunuu i tulaga tau taaloga. O se avanoa lelei e atina‘e ai le lumanai o le tamaitiiti e fiafia ma agavaa i taaloga auā ua tele ina polofesa le anoanoai o taaloga i nei ona po.
E tusa ai la ma faagasologa o taaloga i le taimi nei, ua mae‘a le taaloga ma le Kolisi a Papatoetoe, sa manumalo ai i le 14 i le leai, manumalo foi i le kolisi a Otahuhu i le 32 i le leai a Otahuhu. O le Aso Lulu la o le vaiaso nei ua faamoemoe ai le toe taaloga o lenei malaga taamilo, lea o le a feiloai ai ma Southern Cross i le aai o Magele.
E molimauina e tatou tala i taaloga le malolosi faatasi ai ma le tapena lelei mai o le malaga, talosia ia ia maua pea nisi avanoa faapea i le lumanai e atili atina‘e ai lenei taaloga.
O loo faaalia foi le agaga faafetai o le taitai malaga i le atunuu e tusa ai ma le vaaia lelei o le malaga i tulaga uma. Ia faatutumu atu e le Atua mea ua faagaogaoina, aemaise ai le susuga i le toeaina Rev Mafutaga o le Ekalesia EFKAS i Manukau, i le taliaina o le malaga mai o le Aoga Maualuga a Nuuausala i Niu Sila nei.
