Ua faailoa mai e le puleaoga o le Aoga Faaitumalo a Sagaga, Salā Sio Tipasa, e lei mautu lava le fanua e fausia ai le faleaoga mo le aoga.
O le tausaga na tea nei lea na tapunia ai le aoga lenei ona o le tulaga faaletonu o faleaoga ma le lē saogalemu foi i le tu ai i luga o le sami.
O le isi tulaga talu ai ua iai le manaoga o le aiga e ana le fanua i Tuanai ina ia toe faafoi atu lo latou fanua.
O lea la na faatautaia ai loa aoga a le itumalo lenei i le maota tele o le ekalesia Katoliko i Leauvaa, ae e lē gata i lea o nisi o maota ma laoa o le afioaga o Leauvaa.
Sa tapa se finagalo o le komiti a le aoga ma le pule aoga i le tausaga na tea nei poo le ā le isi laasaga ua vaavaai i ai auā le tali atu i le manaoga o le fanau mo se faleaoga fou ma ta‘u mai ai loa ma Faleula lea la e oo mai i le taimi lenei o loo faatali lava poo fea ua fai i ai lenei taumafaiga. O lea fuafuaga ua tuai ona faatino ona o faafitauli i le fanua e faatū ai le aoga auā alo ma fanau o Itumalo mai le Sagaga le Usoga ma Sagaga le Falefa.
O le tausaga ua tuanai atu, na ofo ai e se tasi o alii tāua o Faleula, le afioga ia Telea lona fanua i Faleula mo le fausia o le faleaoga. Peitai, na ta‘ua e le alii puleaoga, o le fanua lea i Faleula ua mae‘a ona asia e sui o le ofisa o Aoga ma faailoa atu ai i le Komiti o le aoga ma mātua, e lē talafeagai mo le aoga ona e mamao tele mo isi tamaiti toe o le faasiusiuga lea o le Itumalo.
O le fanua o loo iai le aoga i le taimi nei, e lē o pasia e le faletupe o Asia ma le Matagaluega o Aoga, ona o le tulaga i le latalata i le sami.
O le fanua foi ua fuafuaina e toe fausia ai le aoga i le pitonuu i Uta o Tuanai, e lē o mautu mo le galuega.
Faaalia e Salā, e mafua mai lea tulaga ona o loo tālia se faaiuga a le Matagaluega o Punaoa Faalenatura ma le Siosiomaga i se latou lipoti mo le faatinoina o le galuega ona o loo manaomia se pepa o le iuga a le faamasinoga a le aiga e ona le fanua ua fuafua mo le faleaoga fou.
E lei maua se faatalatalanoaga ma se sui o le Komiti o le aoga se‘i vaganā ai se finagalo o le teutupe, Muagututagata Peter Ah Him, lea na ia ta‘ua o le faafitauli lava o le tuai o lea fuafuaga ona o le itu tau fanua.
Faaalia e le susuga i le alii pule o le aoga a Sagaga, o loo loma le fonotaga a le komiti ma mātua, ma e talitonu o le a talanoaina ai lea mataupu auā le fausia o le faleaoga mo le aoga a le Itumalo.
O le isi mataupu i faitioga ua oo mai i piliaoga o le fanau, e lei finagalo le alii pule e faaalia ai sona finagalo ona e manaomia le faafesootai sa‘o o se sui o le komiti
mo lea tulaga.
