O le mafuaaga na talo faatopetope ai le fonotaga a leoleo, faafeagaiga, faauluuluga o faalapotopotoga Pasefika aemaise Samoa ma Toga, ona o faamatalaga ave sese.
O le alii Toga o Ta‘ane Tupola, o loo galue mai le ofisa o leoleo i Campbelltown, faasootaga ma atunuu eseese, na ia laga le tatau ona faia se feiloaiga auā se fofo o nei faafitauli. O le tamaitai Samoa o Vela Asia Andrews o loo faafoeina le Australia Pacific & Maori Community Service Inc mai le itumalo lava lea, na ia logoina le mamalu o lo tatou atunuu.
Na usuia lenei fonotaga i le ofisa o leoleo i Bankstown, i le Aso Faraile, ‘afa o le sefulu i le taeao seia paia le ‘afa o le tasi i le aoauli. E tolusefululima le aofaiga, toafā faafeagaiga Samoa, toafā mai Toga ma le toatasi mai Fiti.
O le isi luasefuluono, o faauluuluga mai faalapotopotoga a le Pasefika, ma sui o leoleo e toatolu, i le itu lea o le puipuiga o faalavelave tuga.
Sa tatalaina le fonotaga e Ta‘ane, faafeiloaia ma faafetaia foi le mamalu lasilasi ona o le auai atu, sosoo atu ai ma le tatalo puupuu na saunia e le faafeagaiga Toga, faauluuluga o le Ekalesia a Iesu Keriso a le Au Paia o Aso e Gata Ai, Salesi Tupou. O Dave Eardley, le pule o le ofisa o leoleo mai Bankstown na ia faamalamalamaina le mataupu ua faatopetope ai lenei fonotaga.
Na amataina lana saunoaga faapenei, “E faafetai atu le ofisa o leoleo a Niu Sa Uelese i loo outou afifio mai, e lagolagoina lenei fonotaga.
Ua ia te i matou le popolega ona o faamatalaga ave sese ma tala faatupu, ua salalau atu ona o lenei faalavelave.
Matou te talosagaina lo tatou galulue faatasi, aemaise ona o outou o faafeagaiga ma taitai o outou tagata, i Ausetalia nei, e manaomia lava le felagolagomai. Ia outou ta‘u atu le feau lenei, ‘E lei maliu le teine Toga, mai ona manu‘aga.’
O loo faatalitali le faaiuga o suesuega a leoleo, ona faato‘ā mafai ai lea ona mautinoa le mafuaaga sa‘o o lona maliu.”
Na ia ta‘ua e faapea o le toe kuata i le fā i le vaveao o le Aso Sa, ae logoina le latou ofisa i se fusuaga a tupulaga atumotu i le Old Bankstown Plaza. Ina ua taunuu leoleo o loo taatia le tagata e toatasi, ae ua sola le isi.
O lenei fusuaga o se faalavelave sa lē tatau ona tupu mai, ae na te iloa e tele mafuaaga ua ala ai ona iu leaga faapenei.
O tupulaga atumotu nei na tafafao i se fale kalapu i Bankstown lava, lea sa taumafai lo latou ofisa e tapuniina i le vaiaso muamua lea faato‘ā tatala ai. E talitonu i latou o le ‘ava malosi ma le toatele naua o tupulaga talavou ua mafua ai. E lei mafai ona tuuina mai se kopi o le latou lipoti mo le Samoa Times, ona e lei mae‘a lelei a latou suesuega.
Na sosoo ma le saunoaga a Ta‘ane. “Na matou oo atu i le aiga o le tamaitai ua maliu mo se feiloaiga ma le aiga. E lei faigofie la matou sāvali, ona e faapopoleina ina ne‘i agaleagaina i matou, pe ono afaina ai i matou.
Ae peitai na talia lelei i matou, ma faamalie mai foi e le aiga ona ua lē saunia lelei se taumafataga. O a‘u ua loa tausaga o o‘u galue i leoleo, ua tau sau le faavaivai. Aisea? Ua tele ina ulagia ita e lo matou ofisa aemaise foi o a‘u pule, e faapea.
“Ta‘ane, fai mai foi o outou tagata e toaaga tele i le lotu, ae o lenei ua solomua i le soli tulafono. Ua ta lē lavā maasiasi, aisea? Ua tumu falepuipui i o tatou tagata. Ua ova le fiafia e faatauvalea ma fia malolosi solo. Talosia ia tatou fesoasoani atu i mātua mo le faaleleia o o latou tiute. Ae lē gata i lea ia avea i tatou o taitai ma faataitaiga lelei mo nei fanau.”
Na mae‘a le saunoaga ona faasolo ai lea o le faalauiloaina taitoatasi o sui na auai, ma o latou foi manatu i ni vaifofo mo le puipuia o nisi faalavelave e ono tutupu mai. Sa mafuli le tele o finagalo, i itu nei: (1) O mātua lava ma le aiga le laasaga muamua, o le tama poo le teine talavou. A lelei ona a‘oa‘oina, ma mautu le faavae o soo se aiga, e faigata ona soli tulafono. (2) O Ekalesia e tatau ona matuā fesoasoani atu i nei fanau ona o le tele o taimi, ua pisi mātua i galuega, ae sosola ai i fale kalapu pe feoai solo. (3) Ia tatou taumafai e aveese faiga na tatou ola a‘e ai, o le soona fasi o tamaiti, ae lei oo i ai se aoaiga ma iloa ai ona sese.
Atonu foi o le mafuaaga lea o nei faalavelave ua tutupu soo mai. Ua tatou mafuli i le fasi, ae lē suiina muamua i tatou, e avea ma faataitaiga, faato‘ā mafai ai ona sui le fanau. E lē mafai ona suia amioga ma uiga leaga pe a leaga foi mātua, e oo foi ia i tatou..
Na faatalosagaina le amata galulue faatasi o faalapotopotoga a le Pasefika ma leoleo, lea na faia ai sa latou leoleoga i nofoaga o loo tutupu mai ai nei faalavelave, i le itumalo a Bankstown.
E faafetaia foi e le tatou nusipepa, le Fono Aoao a Samoa, lau Susuga Rev Iakopo, Faafeagaiga faufautua, ma lau afioga Muagututia Vailolo ma la outou laulau, ona o le tofa ma le faautaga auā le nofo fealofani ma le saogalemu o o tatou tagata.
O lea ua tou faatagisia ai le faamagaloga a o tatou uso mai Toga, i luga o alaleo faasalalau a lo latou atunuu. E lē gata i lea a o outou fonotaga ma faafeagaiga ma taitai Toga, ae lei taloina lenei fonotaga ma leoleo. Faapea foi ona ave atu le faafetai i faafeagaiga nei, ona ua tou faamuamua lenei fonotaga, talu lava le alofa i mata o le fanau.
Rev Alan Aloese Filipaina, faauluuluga o le Ekalesia Faapotopotoga Kerisiano Ausetalia ma Niu Sila, mo lau faatoesega i le taimi o le fonotaga. Rev Itione Faavae-Eli P.I.C.C Minto ma Pastor Ifo Taotua. Ae lē faagaloina foi lau Susuga Vela Asia Andrews ma lau aufaigaluega ona o a outou galuega.
Tatou faamoemoe i le alofa ma le agalelei o le Silisiliesse, auā ni mafaufauga lelei mo i tatou, i le faatautaia o o tatou tiute, faamātua, faafaifeau, faataitai.
Ia avea lo tatou Tamā o i le lagi ma faasinomaga o o tatou olaga, aemaise o a tatou fanau…O measina ia a Samoa mo a Taeao…e pei o le upu a le tusi, “Ia aoaoina le tama e tusa ma o na ala, a matua e le toe tea ese ai.”
