Talalelei Pauga

O le toe aso o le faamasinoga o Talalelei Pauga le Aso Faraile ua mavae atu nei, e lei toe fia talanoa o ia i tusitala a’o fia maua sona manatu pe aisea ua suia ai lana tali tetee i le ioe i lona moliaga o le faia o se ta’utinoga sese (false declaration) i le pepa faatumu mo pasese e taunuu i Faleolo le malaevaalele faavaomalo o Samoa. 

O le Aso Faraile ua mavae na lau ai le faai’uga a le faamasinoga ina ua ioe Talalelei Pauga ma faatonuina ai e totogi le aofaiga atoa o lana sala tupe e $2,400 tala. 

O le Aso Tofi ua mavae sa suesue ai le talosaga a Talalelei e fia tuua Samoa se’i alu e asi lona aiga i Ausetalia ma alu i lana galuega ona toe foi ai lea i Samoa mo le suesueina o lona moliaga. Peitai a’o alu taualumaga a le faamasinoga na toe fesootai ane lē ua molia i lana loia ma faailoa iai e sui loa lana tali i le ioe. Na mafua ona suia le mafaufau o le taulealea ona e tele vaega o lana talosaga sa suesue auiliili e le faamasinoga aemaise o se tasi o mau sa faavae ai lana talosaga, e lē maua i Samoa ana fualaau ma vai faafomai ona e aafia i se gasegase. Sa faailoa iai e le loia a leoleo o ana fualaau ma vai e maua i Samoa peitai o lea vaega o lana talosaga, e lei mafai e lana loia ona tuuina atu se lipoti a se fomai e lagolago ai le manaomia tele o ana fualaau ma vai mo le togafitia o lona gasegase. 

O i tonu na suia ai le lagona o Talalelei ma logoina loa lana loia i le suiga o lana tali. I le faaiuga a le afioga i le faamasino o Leota Raymond Schuster sa lē talia ai le finauga a le loia a Talalelei e faia se faaiuga e faapafala se faasalaga e aunoa ma le faamaonia o le moliaga poo le discharge without a conviction.

I le silasila a le faamasinoga e ui lava e lē o se moliaga e matuia peitai o le lē faamaoni o Talalelei i lana tautinoga e leai ni ona moliaga ua faamaonia, o se gaioiga sa ioeina e le faamasinoga le finauga a le loia a leoleo, e tatau i soo se tagata malaga e afea Samoa ona faailoa ni ana solitulafono ua faamaonia e le faamasinoga mo le itu i le puipuiga o le saogalemu o se atunuu, aemaise o lenei vaitau ua siitia le solitulafono o tagata faatupu faalavelave poo terorisi.

O moliaga o Talalelei Pauga na faamaonia i le faamasinoga i Ausetalia. O nisi o solitulafono o moliaga tautaavale afi a’o nisi solitulafono e fesootai ma moliaga o le faatupu vevesi. 

O le moliaga mulimuli sa faamaonia o le faia o se gaioiga e talepe ai le filemu (causing public nuisance) sa faasala ai i le sala tupe e limaselau tala Ausetalia.

O Talalelei Pauga na molia e leoleo i Ausetalia ona o lana gaioiga na ia ulufale ai i se maota sa faia ai le faatasiga a Samoa i le aai o Perisipeni sa saunoa ai le Palemia o Samoa i le uluai malaga faataupou a le Samoa Airways. Sa togi atu ai e lē ua molia se ulupuaa ma nisi aano o manufasi a’o saunoa le Palemia susuga Tuilaepa Lupesoliai Sailele Malielegaoi.