Sa iai se tamaititi na ola mai lava, e lei atoa lona sefulu tausaga ae vaaia e ona matua e foliga e iai se faaletonu i loa soifua maloloina.
Na faia le tele o suesuega a fomai ma faailoa ane ai le tala faanoanoa i le ulugalii, o si a la tama o Timo e aafia i le kanesa. E lei faavaivai le ulugalii i le tausiga o le la tama, ma na aulia lava lona sefuluvalu tausaga e ui o lena taimi atoa, e lei asa se tausaga ma ni taimi e toetoe lava a faiaina lenei tamaititi i lana tauiviga ma ma‘i.
Ua atoa nei lona sefuluvalu tausaga, ae o le isi mea i si nei tama talavou, atonu e na o aso lava e moomia ai ona ave i le falemai, e ono aliali ai le tino i fafo mai lo latou fale, ae o le tele o lona olaga atoa, e na o le nofonofo lava i le fale ma faifai ai ana galuega laiti e faaalu i ai lona mafaufau, pe faitau foi ana tusi ma nisi mea e fiafia e faaaoga i ai lona taimi.
O le isi toe faaletonu i lena lava tausaga na faavave atu ai foi i le falemai, ma o le faamatalaga a le fomai i matua o le tama, e le o toe atoa se lua masina e soifua ai si a la tama, ona ua matua soo atoa le kanesa i vaega uma o ponaivi i o lona tino.
O se malaga faanoanoa a o toe taliu le taavale a le ulugalii ma si a la tama i le fale. Na tagi atu lava le tina, le fafine o Rosa i le auala, a o taumafai le tamaloa o Tomasi e faamafanafana si ona toalua, aemaise foi o si ona atalii.
Ae na faateia le ulugalii ina ua taunuu le taavale i le fale ma savavali atu i totonu, ae faapea atu le la tama, “Tamā & Tinā, sei tatou o i lo‘u potu e fai se tatou tala”. Ua fetilofai le ulugalii aua o se taimi muamua lea ua faapea atu ai se upu a le la tama.
Ua matu vave loimata o le fafine a o savavali i totonu ma agai atu loa i le potu o si a la tama.
Na saofafai ifo le ulugalii i luga o le moega o le tama, ae ua toso mai e Timo le nofoa ma saofai atu ai e faasaga tonu i nai ona matua. “Tamā, Tinā, atonu ua ese lenei aso i le tatou aiga.
E moni lava sa tatou iloa uma lava ua ou mai, ae atonu ua ese lenei aso, ona ua tau maoti mai e le fomai se umi o totoe mo au. Ae vaai oulua matua, ua sili atu ai nei la lou fiafia, ona o lea ua ou iloa tonu le taimi o le a tatou mavae ai.”
E fai lava tala a le tama, ae ua le mafai le maligi faavai ifo o loimata o si ona tina, ae o loo to‘a pea le tamaloa o Tomasi e ui ua matua mūmū atoa ona foliga i le mafatia. “Ou te le o fai atu ua ou fiafia ona faapea ua ou fia alu ese ma oulua. Ae ou te fiafia, ona o lea ua ou nofo tapena ai nei foi, e fai uma lava ni au tala ou te manao ou te fia talanoa atu ai ia oulua ou matua pele, a o lei motusia le tatou mafutaga e le oti.
O taeao ou te le toe nofonofo i le fale, ae o le a ou alu, sei ou savalivali solo i totonu o si o tatou nuu, sei ou matamata ma vaavaai i le matagofie o foafoaga a lo tatou Atua sili. Ina ua ou moe ifo i le tuugamau, ae ua ou vaaitino ma talisapaia le alofa o lo tatou Atua ia i tatou.”
O le auala na talanoa ai le tama o Timo i ona matua, ua matua ese lava i le faalogo a ona matua. E ui i ni o la lagona faanoanoa o loo iai, ae ua lagonaina foi ma le lototele i le faalogo atu, e le o fefe le tama i lona sauni atu i le oti.
Ua aapa mai le tamaloa ma uu limalua atu lima o si ona atalii e peiseai o loo manao ia faalatalata atu lana saofai ia laua.
“Timo, e moni a oe, o loo tumu maua ma lou tina i le faanoanoa, o le ala foi lena o lou vaavaai mai, ua le mafai ona matu loimata o si ou tina, ona e ui lava i nei tausaga uma sa ia iloa lava lou mafatiaga i lou mai, ae o le lagona lava ia o le matua alofa, e le taitai ona manao e tau lona loto i le mea faapea o le a oti sana tama.
O oe o lo ma tofi tautele mai le Atua, o le meaalofa oe a le Atua mo i maua. Lona uiga, poo le a lava le umi o lou mai, e le taitai ona ma faavaivai e tausi oe. Peitai o le talanoa mai a le fomai i lenei aso, ma faailoa mai se umi o loo totoe mo oe i lenei olaga, o le ala tonu lena o le vaivai o le loto o si ou tina. I le taimi e tasi atalii, ua e aumaia se faamafanafanaga ma se lototele i o ma loto, i le auala o loo e sauni ai foi oe mo le faaiuina o lau taua ma lou mai.”
Ona faagasolo ai lava lea o le talanoaga a le aiga, ma ua amata nei ona uma tala faamomoiloto, ae ua faasolo lava ina toa malie lagona mafatia o si fafine o Rosa, ae ua taumafai e talanoa lelei atu i si ana tama. E mautinoa e tele mea o loo fia fesili ma faailoa e le fafine i lana tama i lea taimi, ae o loo faigata pea ia Rosa ona talanoa i se auala e peiseai ua moomia ona fai uma tala ona ua lata ina oti le tama.
Ua mafaufau nei le tama o Timo, e fai sana tala e faaata ai lona tina.
“A ea Tina, ai ana ou le mai faapenei o fia ni ipu o ni ou faailoga e maua, aua semanu ai se saoasaoa o sau tamo‘e i ni afeleti e pei foi o oe a o e aoga, a ea?” Ua ata si fafine ma tago mai fusi atu le ulu o si ana tama ma sogi i ai. “E moni lelei oe, ua e maua uma lo‘u fuaitino a o ou tuputupu ae i na foi tausaga.
Ae sa ou mafaufau lava, a e matua ou te le taumafai e unai oe i taaloga e pei o le mea na alu uma ai lou malosi a o ma lei nonofo ma lou tamā. Sa ou manao ia foai lou lou ola e te auauna mo lo tatou Atua, aemaise ina ua ou iloa mai lou laititi, e le o oe o se tamaititi e malosi atoatoa lou tino e pei o isi tamaiti.”
E fai lava tala a le fafine ma maligiligi foi ona loimata.
“Sa ou tatalo i le Atua, e tausi mai lou mai, ma afai e toe faafoi mai sou malosi atoatoa, ona ou foai lea o oe e fai ma a ma taulaga e faia lona finagalo. Ae o lenei la ua le taulau ou moomooga, ia e leai se mea e afaina ai. E le mafai foi ona ou tuuaia le Atua faapea ua le alofa mai ma foai mai sou malosi.
Ua malie atoatoa o ma loto ma si ou tama, i le tali mai a le Atua i o ma fanoga, ma lenei umi na e ola mai ai lava ma lenei mai, ae ona pau lava o le soifuaga o loo tatou ola ai nei, ua leai se mea o toe atoatoa.”
“O lau tatalo faafetai i le Atua, ua ia faamanuiaina o ma olaga ma si ou tama, i lenei 18 tausaga sa ma tausia ai se oloa taua, o se tama e ola matau ia te Ia. O lau faalogo atu foi i lau talanoa ai, ua ou lototele ai foi, i lou iloa, o loo e malie atoatoa i le tulaga ua oo i ai lou mai.
Poo le a lava le taimi o le a faamutaina ai la tatou mafutaga, ua ma sauni foi ma te faatofa atu, ae tuu oe e te moe, seia oo ina tatou toe feiloai pe a e toe alafai mai i le toetu, aemaise o le a ma faafeiloaia ai oe i lou soifua o le a malosi atoatoa.”
Na uma lenei talanoaga faamomoiloto a le aiga, ona fai lea o le latou tatalo. Na toe savavali ese mai fafo le ulugalii mai le potu o le la tama, ae ua tu ae nei i luga le alii o Timo, ua sui ona lavalava, ua faamaulu lona pulou ma ona seevae koleni, ona agai loa lea i fafo, ma amata loa ona savali faataamilo i le nuu atoa. O se vaaiga na ese i le matau mai a tuaoi, ma na tuufesili le toatele poo le mea ua malosi le tama o Timo.
Na atoa lelei lena masina o fai pea le masani a Timo o le uma loa o lana malu taeao ona alu foi lea e savalivali, ma e foliga sa faapolokalame uma lava e le tama lana tapenapenaga. Aua e le gata ina vaaia nei suiga i totonu o lona nuu, ae ua matau e ona matua, le pisi o Timo i ana tusitusiga e fai.
Atonu na lagona lava e Timo i lona tino le umi o sona malosi o toe totoe. Aua e faagasolo le masina mulimuli lea e lona lua i ai masina na tau atu e le fomai, ae ua amata foi ona tau fai ifo le malosi o Timo, ma ua tele ina nofo i le fale ma faaalu le tele o lona taimi i lana masini komepiuta.
Sa tuufesili mafaufau o le ulugalii, poo a lava mea ia o loo pisi le la tama e fai, ae na onosai pea ona e fai foi o le fia iloa, ae peiseai e faigata mo laua ona iloa ina nei tei ua faanoanoa ai.
Peitai o le vaiaso lava lea na uma ai le ola o Timo, sa malamalama lelei le tama ma faatofa ane i ona matua, ona moeiini ai loa lea. Ina ua uma le pisi o le ulugalii i toe sauniga o si a la tama, na la o ane i lona potu ma fetagisi ai, ona amata lea ona iloilo uma ana mea sa fai.
Na tau atu le ulugalii i totonu o le kapoti lavalava a le tama, o loo iai se pusa e tumu lelei i tusi, e maua lava le 200 o teutusi o loo iai. Na faasolo pea le vaai a le ulugalii ma la iloa ai, o tagata uma lava o le latou ekalesia o loo tofu ma tusi, o tamaiti, o tamā, o tinā, a o isi tusi, e tofu uma aiga o le latou pitonuu ma tusi.
Na tufa e le ulugalii tusi uma nei, ma sa vaaia le tutulu o tagata uma a o lauina a latou tusi, sa faamavae atu ai lenei tama ia i latou uma, ma ona moomooga, ia tumau pea ona avea i latou ma tagata o se nuu lelei, o tagata o se ekalesia lelei.
Ae o le isi vaega uma o ana tusi, o ana faafetai i ona matua i aso uma, mai lava le uluai aso na ia iloa ai, ua aafia i le kanesa.
