E ui ina ua fai si leva talu mai le Teuila, ae lei taitai ona uma tala i le maeu o le faamaoni o faatinoga a le auvaa a Tolotolo o Tamauli, ona na maua le avanoa e fesootai atu ai le sui o le Samoa Times i Samoa mo lea faamoemoe.
Na faamatala se tasi o matai komiti o le auvaa, e ese le toatele o tamaiti fou na faaatoa ai le auvaa i lenei taumafaiga, ma e tusa o le ‘afa o le ‘aualo o tamaiti fou, ma sa taumafai pea ma le faamaoni tamaiti nei i le lua vaiaso na toleni ai mo le faamoemoe.
E lei atoa le auvaa i le itupa o alii ona aumai lea o se tasi o alo tamaitai o le afioaga, ua faaatoa ai.
O le itu lea na sili ona momomo ai le loto o le sui o le nusipepa, ona ua vaai atu i si nei tamai teineitiiti e toatasi lava e filo ai. O se alo o se tasi o Pauli o Salelologa lava. A tou silasila ane i le ata o le auvaa lena e fusi i le ie pa‘epa‘e lona ulu, a o lena e saofai i le laina i luma o le ata.
O le taimi o le tuuga na amata mai lava i le fealumi mai ma le vaa o Manono le Tavaesina i le tulaga muamua, ae o le faasalalauga a le alii o le leitio i le taimi o le tuuga na ia faapea mai ai “O lea ua liliu le Tolotolo o Tamauli mai le pole o le a faasaga i le tini ma pei ua tau faaletonu.” O le taimi tonu lena na fai ai si tuai o le liliu ma avea ai ma mea na sao ai loa le sa o Manono i luma.
A o sau pea le tuuga na faalogo atu i le leitio o faasalalau mai le taufai tauva malolosi o le Little Rina ma le Tolotolo i le tulaga lua.
A uma na lua le Little Rina ua sosolo atu i le tulaga lua le Tolotolo ma faapena ai lava le fealumi mai o nei sa e lua i le alavaa, ae ua sao pea i luma le Tava‘esina a Manono.
E ofo le maimoa a le atunuu ina ua sosolo mai le Tava‘esina i le mua ae tasi le minute na va ai ma le Tolotolo o Tamauli i le tini. O le agaga faafetai ma faamalo i le susuga i le kapeteni, le Tofa ia Pauli i le to‘a ma le faafoega o le auvaa ma le malolosi na tauva ai. E ui ina fou le ‘afa o le auvaa toe faaatoa i le tamaitai le auvaa, ae na toeitiiti lava sola ma le mua le Tolotolo o Tamauli i le tuuga.
O le Aso Lulu a o lumanai le aso o tuuga na malaga mai ai mai Savaii le susuga i le Tausi Matagaluega ia Reupena Asiata i Mulinuu na te taitaia le sauniga tapuai i le Atua mo le faamoemoe o le auvaa o le afioaga.
O le komiti o matai na tapuaia le auvaa ma taitaia le malaga, o loo i le ata foi i latou o le Tofa ia Pauli Apelu Atioo, Taotua Ioane Matamua, Pauli Si‘ologa ma isi e lē o maua uma suafa.
A o i latou ia na fai ma sui i le tapuaiga o le paia faasino i le afio o Muagututi‘a ma Luamanuvae, Tinousi ma le susuga ia Su‘a, le Malelega a le Malietoa, tainanae le mamalu o le Falefia ma le Falesalafai, le Lologa Pule ma le Faitoaga na Lave i Manino, Lave i ‘A‘ava.
O le taimi foi na mae‘a ai le tuuga ma toe foi i Mulinuu le auvaa i lo latou api ma faapea foi ona toe saunia le tatalo faafetai e toe faafoi i le Atua e le Faafeagaiga ia Reupena Asiata a o lei tuuvaa o ia mo Salafai i lea lava aso. Na faapea foi ona momoli le faamalo ma le faafetai i le auvaa faapea le kapeteni, le Tofa ia Pauli mo le loto tetele ma le faamaoni i le tuuga ma ua iloa ai lava e lei faavaivai le Tolotolo o Tamauli.
Ua moni ai foi le pese e pei ona salalau nei: Tolotolo o Tamauli alu pea i ai ‘aua le solomuli. Manuia tele fuafuaga a lenei sa o Saleleologa ma Salafai i le lumanai.
