O le tapunia o le Maketi o fua o faaeleeleaga i Fugalei i le tausaga na tea nei na agiga ai ma faamatalaga e faapea, e tatau ona mae‘a le galuega tele o le toe faafouga atoa o lea nofoaga faitele i le amataga o le tausaga fou 2014.
Sa iai le manatu o le toatele o le a tapunia nei ae o le a vave ona amata le galuega peitai e oo mai i le taimi lenei e leai lava ma se samala ua pa‘ō a o se masini foi o faaola mai i totonu o le pa o apa ua siomia ai lea nofoaga ae o loo tumutumu pea le atunuu i nofoaga lē tumau i fafo atu o le pa apa tele lenei i le faatauga o a latou meamata faapea isi taumafa ma fualaau faisua faapea fualaau‘aina e faatalitali ai le taimi e maua ai se avanoa i totonu o lea nofoaga fou.
I se feiloaiga ma le alii Ofisa Sili o le Komiti o Taui o Faalavelave Faafuasei le faalapotopotoga a le Malo o loo pulea maketi i Samoa, Malaeulu Lose Niumata, ua mafua le tuai amata o lea galuega, ona e lei maua lava se kamupani faufale na te
faatautaia le galuega.
O le filifilia o lea kamupani o loo nafa lea ma le soakomiti e iai i totonu sui o le Ofisa o le Loia Sili, sui o le Matagaluega o Tupe, sui o le Matagaluega o Galuega faapea le sui o le latou faalapotopotoga o Taui o Faalavelave Faafuasei.
E 11 konekarate faufale ua taatitia nei i luma o lea komiti a latou tauofoga i le faatinoga o lenei galuega ma ua faagasolo nei le galuega o le tau iloiloina o se kamupani e talafeagai i le silasila a le soakomiti lo latou faatinoina o le galuega.
“E lē mafai ona vave faatinoa le galuega se‘i vagana ua mae‘a ona faagaioi tulaga uma, ina ia aua ne‘i faaletonu se mea i le taimi mulimuli,” o le saunoaga lea a Malaeulu.
E mae‘a le filifiliga a le soakomiti lenei ona agai lea o le latou faaiuga i le Kapeneta ma o iina e faamaonia ai se filifiliga ma faalauiloa loa a o lei amata le galuega tele.
O le faamuamua o loo ave i le faamaualuga o le nofoaga fou mo le mamalu o i latou o le a faatau ai a latou oloa i Fugalei ma ua tele tausaga o vaaia le mafatia o le aufaatau fua o faatoaga ma galuega taulima, faapea ai ma fale‘aiga i lologa i taimi leaga o le tau.
O lea la ua iai le fuafuaga e fogafale lua le nofoaga lea ma o le a galulue foi i le faaleleia o alavai ia e tele ina poloka ma tulai
mai ai lologa.
Ua toeititi foi mae‘a se isi nofoaga ua fuafua mo le au faifaatoaga ma le au fai fale‘aiga ma o le maketi tele lea a le kamupani o Amau (Chan Mow) o loo fausia i Togafuafua ma le faamoemoe a mae‘a ona tatala lea o le fogafale a lalo mo le au fai fale‘aiga faapea ai le au fai faatoaga auā le faatauina o a latou oloa, ae o le fogafale a luga ua fuafua mo le supamaketi a le kamupani lea o le a see ese mai i le maota o Burns Philip i autafa o le uati i Matafele pe a mae‘a lea foi galuega.
Atonu o le a muamua faaaogā lea nofoaga a o lei tatala le galuega o le Maketi i Fugalei.
