Na tiga le tetele o timuga ma le savili i le taeao o le Aso Toonai, ae lei faavaivai ai tina ma tamā matutua aemaise o susuga i faafeagaiga ma o latou faletua faapea tupulaga talavou seia oo lava i fanau laiti, i le faataunuuina lea o le savali e faailoa atu ai lo latou agaga alofa ia i latou ua mafatia i avega ona o lenei gasegase o le kanesa.
O le ma’i ua leai sona tuaoi, ua iai i latou ua maliliu ai, ua iai foi i latou o loo gasegase ai i le taimi nei, ae ua iai foi i latou ua manuia mai i lenei ma’i.
O le tafili saunoa ai o lenei ma’i i le toatele o tagata, ua autasi ai lagona o le ekalesia EFKS Puaseisei i Magele Sasae ae o se tofa faale-Atua ua a’e i le susuga i le faafeagaiga ia Victor Pouesi ma le faletua ia Salome ma le ekalesia, e tatau ona faia se savali e faailoa atu ai ia te i latou o loo maua i lenei ma’i lo latou loto naunau ma le loto alofa e tausoa faatasi ai mafatiaga o loo maua ai i lenei gasegase. O le lagona e tatau ona tutū faatasi ai tagata uma ma faailoa lo latou tetee atu i le ma’i o le kanesa.
O le alofa e leai sona tuaoi, o le ala lea o le savalia ai o le ala i le taeao o le Aso Toonai i totonu o Magele faasolo mai i Papatoetoe seia toe tini atu i le malumalu tapuai EFKS i Puaseisei, o lagona e faailoa ai le alofa moni ina ia tiga faatasi tagata uma ma lagona faatasi mafatiaga o loo iai foi le isi uso a tagata.
O le faamoemoe na taulamua ai susuga i faafeagaiga e pei ona iai le susuga ia Rev Victor Pouesi faapea le susuga i le faafeagaiga ia Ata Milo aemaise o nisi o tagata mai nisi o ekalesia faapea nisi o faalapotopotoga.
O le taimi muamua lenei ua amatamea ai le ekalesia EFKS Puaseisei i lenei faamoemoe tāua ma le manatu maualuga o le susuga i le faafeagaiga ma le ekalesia i Magele Sasae o le a faataunuuina lava lenei polokalame i tausaga taitasi.
Na muamua amata le polokalame i le taeao i le tatalo ona amata ai lea o le savaliga. Na vaaia le pulunaunau o nai tina ma tamā matutua e oo lava i nai fanau laiti i le fia faataunuuina o lenei faamoemoe mo tagata ua maua i lenei gasegase. O le sa o le alii malu o le malo ia Papaloa Talosaga na ta’ita’iina le savali.
Ma o se faata’ita’iga lelei tele lea ua molimau atu ai le talalelei ma se feau tāua mo le lautele o tagata e tatau ona tutū faatasi tagata uma e tetee atu i le ma’i o le kanesa faatasi ai ma le nono manū faatasi i le Atua e ala i lana faamalologa mo tagata uma, auā e iai le talitonuga o susuga i faafeagaiga ma le au Kerisiano faatuatua e mafaia e le mana o le toto o Iesu Keriso ona tineia ma faamalolo i lenei ma’i.
A’o se isi laasaga fou foi lea e faamalosia ai le soifua maloloina lelei i tagata lautele e ala lea i le faatāuaina o le savali ma le faia o le faamalosi tino. Aemaise ai ia tausisi lelei le tagata soifua i ana meatausami, auā o le tasi lea faata’ita’iga lelei sa vaaia i le taeao o le Aso Toonai o le faamalosia lea o le taumafa i taumafa paleni e pei o apu, moli ma isi lava fualaau’aina sa iai i lea aso. E pei ona saunoa le susuga i le faafeagaiga ia Rev Victor Pouesi e ala ona mama’i tatou, o tatou lava e lē tausisi ma mataala tatou i meaai e ao ona tatou aai ai.
O le aogā o lenei polokalame e fafagu ma faamanatu ai i tagata lautele e tatau ona tausi lelei lou soifua maloloina.
O lona agaga faafetai foi i ulugalii laiti o lana ekalesia ona o le latou tutū malosi e tapena lenei faamoemoe faatasi ai ma le lagolagosua o nai tina ma tamā matutua. Lea lava na vaaia i lea aso e lei iai se tasi na faavaivai i le taumafai lea e galulue faatasi ina ia faataunuuina le faamoemoe.
O le afioga ia Muliagatele Shiu Singh na lagolagoina lenei polokalame e ala lea i togiga matagofie sa laeiina i lea aso, ae o le susuga ia Lemalu Semo Sititi sa ia ta’ita’iina polokalame.
Na toe faaiu mea uma i le malae i Puaseisei i Magele i Sasae ma faauma ai polokalame i le tatalo ma inu ai le iputi na saunia e le ekalesia.
