E tele naua ni faafitauli o loo feagai ma nisi o le tatou Atunuu e faigofie lava ona fofo e latou lava ia, pe afai lea e vave fesili mo se fesoasoani.
O le mea o loo tupu, e toatele lava nisi o loo tulai mai faafitauli ae taatia ai lava seia oo lava i le taimi mulimuli, ma oo ai loa ina ua tuai ona toe maua atu i ai se fesoasoani o loo latou manaomia.
O loo maua mai ni lipoti mai le Ofisa o Fale, e toatele nisi o aiga ua ave i le faamasinoga o fale ona ua lē totogia le totogi o fale.
Mulimuli ane ua fiu le Ofisa o Fale e tulituli le totogi o o latou fale, ae ua aloalo mamao le tagata lea.
Ona sosoo loa lea ma le ave e le Ofisa o Fale i le Faamasinoga o Fale (Tenancy Tribunal) ina ia aveesea lea aiga mai le fale o loo nonofo ai, ma totogi mai tupe e lei totogia i aso sa nonofo ai i le fale.
Ona faaauau pea lea o le faamasinoga o fale i lenei mataupu ma ua aumai le faaiuga a le faamasinoga o fale ua tatau ona aveese loa lea aiga mai lea fale.
O le taimi lea faatoa sulu solo ai loa lenei aiga e saili se fesoasoani. Peitai ane, ua “too late” e pei ona fai mai ai le isi tamaloa
Maori.
A fesili atu i ai pe aisea ua lē totogia ai le totogi o le fale, ae tali mai sa iai nai aitalafu sa totogi, pe o se faalavelave sa feagai ma latou.
O nei lava ituaiga tali e iloa ai e lē o taitai lava malamalama nei aiga i le olaga faa-Niu Sila.
Afai e te lē totogia le totogi o le fale, ua mafai ona aveese oe mai lea fale. O le totogi o le fale e tatau ona faamuamua i lo se isi lava mea. Afai foi o le a lē totogiina le fale i lenei vaiaso, e tatau lava ona e vave fesootai le Ofisa o Fale, poo le tagata e ana le fale o loo e nofo ai ma faailoa i ai le faafitauli o loo feagai ma oe.
E lē gata i lea e tatau ona e sauni ma sau fuafuaga e toe vave totogi ai le vaiaso o le a misi o le totogi o le fale. Ia aua, aua lava ne‘i e manatu e leai se mea e tupu i lou nofonofo e aunoa ma sau galuega e fai e faafesootai vave ai le tagata e ana le fale o loo e nofo ai.
Afai foi ua maua mai se tusi a le faamasinoga o fale, talu ai lava lou faatamala, e tatau lava ona e alu i lea faamasinoga.
E tatau foi ona e alu sauni ma faaali i le faamasinoga sau fuafuaga mo le toe totogiina o tupe ua e lē totogiina mo le fale o loo e nofo ai.
O le taimi lava e misi ai le totogiina o le fale, e tatau lava ona ave lau faamuamua ia vave totogi ia aso manu e lei oo i luma o le faamasinoga o fale.
Afai e te lē mafai ona e totogi le fale mo oe ma lou aiga, ua lē o toe maua lava se isi fesoasoani mai matagaluega a le malo.
E tatau lava ona ave le faamuamua i mea e tatau ona faamuamua le totogi i le olaga faa-Niu Sila.
O le isi itu o loo nofo faatamala ai nisi o aiga, o le aumai lea o se isi o latou aiga mai Samoa i visa o tagata tafafao mai i Niu Sila ma le faamoemoe e aumai e vaai se fomai ona o se faatafa gasegase o loo manaomia ai se fesoasoani a le tagata mai Samoa.
Ona oo mai lea o lenei tagata mai Samoa, ma ua ave i le falemai, ma ua sainia e aiga i Niu Sila pepa a le falemai, faapea e totogi lava e latou le pili a fomai, poo se pili o le taotoga e fai i le falemai.
E mulimuli ane ua aumai le pili a le falemai ua silia ma le $40,000, ona fetagisi loa lea ua lē iloa le mea o le a fai.
O le itu muamua, o soo se isi lava e lē nofomau ma e lē sitiseni foi i Niu Sila e lē agavaa mo le vaaia fua e fomai i Niu Sila.
E lē agavaa foi mo se fesoasoani lava mai le falemai. E lē agavaa lava mo se isi lava fesoasoani mai le Malo a Niu Sila.
Afai e fia aumai se isi o lou aiga mai Samoa e o mai e vaai e se fomai i Niu Sila, ia e sauni lelei e te totogia uma pili a le fomai ma pili a le falemai.
Seia vaganā ua aumai e le Malo o Samoa lou aiga i Niu Sila ona faatoa agavaa lea mo se fesoasoani, ae e tatau lava ona fai muamua pepa a o i Samoa e lei malaga mai i Niu Sila.
O lou aumai o lou aiga i se visa o se tagata tafao i Niu Sila a o le faamoemoe o le aumai e vaai e fomai i Niu Sila, o se tulaga taufaasese ma ua e solitulafono.
E lē mafai ona e faapea mai e te lei malamalama i le tulafono. E pa‘ū lava ia te oe lou lē silafia o le tulafono.
O le isi tulaga o loo nofo faatamala ai nisi o tatou aiga, o le liliu lea o latou fanau ina ia maua ai ni nofomau poo sitiseni Niu Sila. Ona mulimuli ane lea ua malaga mai mātua moni o ia tamaiti mai Samoa ma toe taumafai e saili ni latou nofomau i luga o nofomau o latou fanau ia ua uma ona liliu i isi tagata.
Faamolemole Samoa, o le taimi lava e liliu ese ai faaletulafono lou atalii poo lou afafine i se isi tagata, ua lē toe ta‘ua lena tagata o sou alo, ma ua lē mafai foi ona e faamoemoe i ai e fai ai ni ou pepa nofomau.
Ou te faamoemoe ia aogā nei fautuaga mo le silafia e le tatou Atunuu.
