Ona o se mataupu na tulai mai i le vaiaso nei ua lāgā ai le manatu e faamanatu atu i mātua, faapea tagata o aiga, e faasā i le tulafono ona faaaogā e mātua poo se isi o se aiga, se igoa o se isi o le fanau, poo se isi o se aiga, o faigaluega, e tusia i ni feagaiga faaletulafono, ia mafai ai ni loans mai faletupe, e faatau ai se fale pe faatau se pisinisi, ae lē malamalama ma iloa lelei e lē e ona le igoa le mea lea ua fai.
E fautuaina foi alo ma fanau e saili le fesoasoani muamua mai i se tagata e malamalama i le tulafono ma ta‘u atu ia te oe le lautele o mea e te vaai i ai, a o e lei ioe e faaaogā lou igoa.
O mea e tutupu mai e faaaogā i le column lenei, ia nofouta ai tagata uma i mea e lē tatau ona fai, ma mea e lavelavea ai i le tulafono.
O le tele o tagata lē sa‘o, e faaaogā loia, pe a lavelavea i mea lē sa‘o ua o fai, ae leai ni tupe e totogi ai loia mo galuega fai.
Ua tupu soo mai lenei mea o le alu o le tagata o le aiga ua fia faatau se fale, ona ao uma atu lea o tagata o le aiga o faigaluega, e faaaogā o latou igoa e fai ai loans o le fale o le tagata lea na faatauina le fale, ae mulimuli ane ua saisaitia uma tagata o le aiga lea na faaaogā sese ma solitulafono o latou igoa, e le tagata lea na faatauina le fale.
Sa tusia i le tatou column se uso sa faapea ona faaaogā e le uso matua le igoa o lona uso laitiiti i le faatauina o se fale i Papatoetoe. Fai le aiga o le uso matua, alu lava ia faaaogā le fale lea, e fai ai le loan o lona fale ma lona toalua.
Fai loa le aiga o le uso laitiiti, fesiligia loa lona uso matua pe maua mai sana vaega tupe mai le fale muamua ma le fale lona lua, auā le taumafaiga o lona aiga, ae lē manao le uso matua e ave se tupe i le uso laitiiti ona fai mai o ia e tele le tupe na ia totogiina i fale nei.
O le vaiaso nei sa tulai mai se isi faafitauli faapea. O le tina ua alu faaaogā le igoa o lana tama o loo faigaluega e saini ai se feagaiga faaletulafono, e faatau ai se faleaiga, ae foliga mai e lei logoina e le tina lana tama e ona le igoa lea na faaaogā.
O lenei ua te‘i ua sue mai le tama e le tagata e ona le faleaiga lea na fai ai le feagaiga, ona ua lē uma ona totogi le tau o le faleaiga.
O le auna o le tatou column e faamanatu atu i mātua ma uso matutua ma aiga, e faasā i le tulafono ona e faaaogā se igoa o se isi ae lei malie ma malamalama atoa i le uiga o le deal, le tagata e ona lona igoa lea ua e faaaogāina.
Poo oe o le matua, e mafai e lau tama ona su oe ma ave oe i le tulafono, pe afai ua e alu faaaogā le igoa o lau tama e aunoa ma se iloa e lau tama lau mea ua fai.
Ou te faitio foi i le tele o tagata o aiga lea e o faaaogā igoa o uso ma tuagane o loo faigaluega, e fai ai loans ona lē totogiina lea o loans, ae tei ua lavelavea ai fua isi e lei malilie ma malamalama i le faaaogāseseina o o latou igoa.
Aua le seetia i faaupuga nei e masani ona fai:
“Aua e te popole e na ona fai ai lava o le Loan i le taimi nei, ae faitalia a‘u ma totogi”
E lē gata i aiga, ae ua oo i loia, e lē gata i le solitulafono i aiga ma fanau, ona o mai lea o tagata lava nei pe a lavelavea i le tulafono e taumafai e fai galuega faaletulafono, ae leai ni tupe e totogi ai.
E silafia o loia o loo faaaogā o latou taleni e faigaluega ai auā le tausia o o latou aiga, e leai se aso e sao ma se telefoni e faapea faaupuga:
“Ou te faamalie atu ia te oe le tuafafine (poo lau Afioga) ona o le puapuaga ua tulai mai ua ou fia maua vave se fesoasoani”
Ia tatou mataala i le faaaogā sese o tatou e isi lava o tatou tagata, e oo i mātua ma o tatou lava aiga.
E oo foi i faifeau e fai fai a latou galuega, sosola ae lē totogiina. Poo le ā le va, tulaga, ma le piitaga, faaaogā le tulafono e taofi ai mea sese ma le piopio e tulai mai pea.
O le lesona ia i tatou uma, a lē gafatia se mea e faatau ai se fale, aua le faia. A lē gafatia le faaaogā o le taleni o le isi tagata, tago oe e fai ou puapuagatia, ae aua le faaaogāina tagata, ae mulimuli ane ua e lē tausi feagaiga.
Faaaogā aiā tatau i le tulafono pe a soona fai oe e se isi o lou aiga, pe faaaogā sese lou igoa e soo se isi lava, e oo i mātua.
