(O lona faaeaina na aliali ai lona faalumaina)
O le tala i le alii o Elia Lasa mai Falefa, o se tala e filogia faatasi ai le fiafia ma le faanoanoa. Ae o le mea ua mautinoa, o le a lē faigofie ona toe faagaloina lenei suafa, Elia Lasa, i totonu foi o le atunuu.
O le Aso Toonai talu ai, na manumalo ai Elia Lasa i le taaloga, le Samoa Triathlon i Mulifanua. O lena tala fiafia mo Lasa, na avea ma itu ua alia‘e mai ai ma se tala faanoanoa i si nei alii talavou.
A faafaigofie le tala, o Lasa, e lē o iai se atunuu ma‘oti o avea ai o ia ma tagatanuu moni. O le faafitauli, e lē o iai ni ona pepa poo isi lava mea e faamaonia ai lona tagata moni, e pei o se tusifolau, se pepa fanau poo se laisene avetaavale foi.
O lona uiga foi la, o le leai o nei pepa faamaonia mo Lasa, e lei mafai foi la ona ave i se aoga e faaaoga lelei ai, o le iuga, e lē lelei sana tusitusi ma se faitautusi.
E faapea le tala, mai le susuga Seti Afoa, o ia foi o le Faatonu o le Samoa Triathlon Series, e foliga mai o le alii o Elia Lasa na fanau ane i se setete o Amerika, ae na toe taliu lona tina i Samoa ma ave lana tama lenei, le alii o Elia, a o laitiiti lava, ma sa faaaogā ai lava le tusifolau o lona tina e la te malaga faatasi ai.
Peitai na toe foi le tina i Amerika, ae ua tuu ai loa Elia i Samoa e tausi i le aiga o le tina. Na faamatala e Elia i le susuga Seti, e tau leai se sona iloa tele e uiga i lona tina, ma talu lava ona alu ese atu, e lei toe faalogo lava i se tala mai ia te ia.
O le tina o Elia, e mai le afioaga o Falefa, ma e oo foi i le aiga, e lē o iai foi ni a latou fesootaiga ma le tina, ma e lē o iloa e le aiga poo fea se vaipanoa o Amerika o loo iai le tina i lenei taimi, ae pe afai foi o soifua mai pea.
Pau le mea o loo manatua e Elia, o lona tamā o se tagatānuu Tonga, ma le taimi na avatu ai o ia e lona tina i Samoa, ona gata ai lea iina o mea na te manatua. Ua lē gata la ina leai ma ni pepa faamaonia o si nei alii, ae ua atili ai foi ona lē iloa poo ai tonu lona faaiu, auā ua toe alu ese atu le tina i Amerika, ae tuu ai lava si tamaitiiti lea ua ola a‘e i Falefa.
E oo foi la i tausaga o le matua o lenei alii, e tau matemate foi, e tau fuafua lava i le matutua o le tupulaga lea na latou ola faatasi ane i Falefa, ona tau faafetaui atu lea i ai o ona tausaga, pe i se mea o le 24 i le 25 lona matua. O le itu sili lena ona faigata, auā e lē mafai e Elia ona ave se tali sa‘o i se tasi e fesili atu i le matua o lona soifua.
Ina ua auai foi la le alii o Elia i le tautuuga e pei ona mua ai, sa lei faigofie ona ia malamalama lelei i faatonuga o le faatinoga o le taaloga, auā o mea uma o loo tusia i le faaperetania, lea e matuā leai se malamalama ai o Elia.
Ae o le itu maoae lea na tulai mai, o le malosi o lenei alii o Elia Lasa, ma manumalo ai i le tuuga i le Aso Toonai i le tuuga lona lua, Race 2 o le Samoa Triathlon Series.
E lē gata la ina manumalo mai Elia i le tuuga lona 2 lea e pei ona iai nei seia aulia le isi tuuga i le aso 27 o Aperila, ae na manumalo ai foi i se faailoga o se malaga i Brisbane Ausetalia mo le tolu vaiaso i le masina o Me, ma faaauau ai nisi toleniga i le Tri-Alliance i Kuiniselani.
E pei la ona ta‘ua e Seti Afoa, o le toatuga la lea ua feagai nei ma si nei alii, ona atonu o le a faaletonu ana fuafuaga uma mo lea malaga, ona o le leai o ni faamaumauga e faamautinoa ai lona tagatānuu moni.
O lea ua aliali mai le tulaga maoae o le malosi o lenei foi alo o Samoa, pe afai o le a agaigai pea i luma ana taumafaiga, ae o le faafitauli o loo feagai nei ailoga o le a mafai ona faaaogā si nei taulealea e avea ma sui o Samoa i ni taaloga e pei ona talenia ai nei.
E lei toe maua mai se isi lipoti lata mai, pe faamata e ono maua se fesoasoani mo le sailia o ni faamaumauga mo si nei alii, ina ia faagasolo lelei ai ana taaloga ma nisi taulau manuia o loo taatia mai mo lona lumanai.
