Faaauau na tatou matamata i le faataoto i le ui‘i. Ua uma uiga se lua sa talatala i lena vaiaso, ae o le a vaavaai i nisi uiga o le ui‘i e tāua tele.
Ina ua lagona e le ui‘i lona sese, sa ia faapea ifo o le a foi i lona tamā. O se lagona tāua tele, auā e tele taimi e misia ai e tatou avanoa mo ni faaleleiga ma isi, ona e tutupu manatu faaletagata, ma lē mafai ai ona loto faamaualalo.
A lē o lea, o le lagona o le maasiasi, ma oo ai se manatu ua lē toe fia faafesagai ma le tamā, poo nisi foi sa iai ni feeseeseaiga. O i e mafua ai ona solasola mamao, ma ‘alo‘alo ese ma tagata.
ALA O LE SALAMŌ
O le ui‘i, e lei alu ma fafau sona lafitaga, pe tuua‘i i lona uso matua lona alu ese. E lei manatu foi e tuuaia ana uo ma faapea ane, ana leai latou na, semanū ou te lē oo i se olaga leaga. Sa ia faapea ane ma le mautinoa, o ia o le tagata agasala. Ua faapea ifo “O le a a‘u tulai ma alu i lo‘u tamā, ou te fai atu ia te ia, Lo‘u tamā e, ua ou agasala i Lē o i le lagi, atoa ma ou luma …”
E siamupini Samoa i le mea lea o le tautuua‘i, ma faaaogā ni alofaga e lalafi ai e aunoa ma le salamō, ae o le ui‘i e lei ‘alo i le ata o le laau.
O taimi uma e faia ai se agasala, e 3 tagata o loo tatou sese i ai.
• O le Atua: Afai e misi ia tatou le vaega lea, e faigata ona maua i tatou i le salamō faamaoni. Auā o le agasala, o le lē faatuatua lea ma le lē faia o le finagalo o le Atua.
• O isi uso-a-tagata: Na silafia lelei e le ui‘i, ua agasala i Lē o i le lagi, atoa ma lona tamā. E iai taimi tatou te manatu ai e faatoese i le Atua, ae mumusu tele e faamaualalo i le va nonofo ma isi tagata. E manatu, a faatoese lava i le Atua, ua lava lea. Ia manatua, e aogā tele le vatapuia faaletagata soifua, auā e aliali ai mealilo i totonu o tatou loto, pe moni pe lē moni.
• O oe lava ia. Fai mai le ui‘i, ua ou lē toe aogā ona ta‘ua o lou atalii. Ia e avea a‘u ia pei o se tasi o au auauna. Ua ia lagona le faamaualalo ma tautino lona lē toe agavaa.
E tele ina tatou lē malamalama i le vaega lona tolu. E manatu ia faatoese i le Atua, faatoese i isi tagata, ona toe foi lea e faaauau tofiga sa iai e aunoa ma se lagona, ia faaseetuagalu mo se taimi. Pe se‘i toe afua se isi taeao fou. E lē fia toilalo, o le fua faaaliali foi lea o le loto lē salamō moni.
Na lagona e le ui‘i, o le toe mauaina o lona matūpalapala faaleatalii, e lē o sana matafaioi, auā ua sesē. Vaganā le alofa o lona tamā, e mafai ai na toe tulai i lona tulaga sa iai muamua. Ia manatua, e faaeaina lava le tagata loto maualalo, ae tetee e le Atua le tagata faamaualuga toe faasausili.
E iai le muāgagana faapea “o le fili lava o le tama, o le maua.” E lē se salamō faamaoni lea, ua ala ona salamō ina ua maua, ae leai se lagona tigā ona o sesē sa fai. E tuliloaina lava tatou e a tatou filifiliga.
Afai e filifili lelei, e tuliloa tatou e ni taunuuga lelei, ae a fai filifiliga sesē, e mulimulitai foi ia tatou ia faaletonu.
O le mea lea e tatau ai ona soifua tagata i se soifuaga faatatau lelei, auā o lā le Tusi; o le mea e te fuaina atu, e toe fuaina mai.
Sa faapea le ui‘i, e lelei ona manatu, sili atu i lona tamā, ae talofa sa malaia ai. Ua tele foi tagata ua faavaatu‘ia lo latou lumanai ma faaleagaina e le agasala, ona e manatu faatauvaa i fautuaga ma apoapoaiga a isi, aemaise mātua.
IAI LE TAU E TOTOGI O LE AGASALA
Ina ua salamō le ui‘i, e lei toe alu e tulituli ana uo e toe totogi ane tupe sa latou faaaogāina. Ua gau ‘a‘ato, o lea ua iu ina samusamu i meaai a puaa. Leiloa lona tamaoaiga, ae sili ai le maualalo o le olaga ua iai.
O le uiga lea o le tiapolo, na te faasese le tagata i mea e foliga mai e ‘ila‘ila, ae matafi. O mea e foliga mai e faigofie, ae o loo iai le faalumaina ma le tauvalea. O mea e foliga e mamalu, ae o loo iai le pepelo ma le faa‘ole‘ole.
O le iai o se alii Iutaia i se pa puaa, o se tulaga sili lea ona maualalo i tu faa-Iutaia. E matuā faasā ona tago pe papai i puaa, aua e lē mamā.
O manu e inosia, a o lea ua faigaluega ai si uso lea. Ae lē pau lena, sa iu lava ina ‘ai ai ma ia i meaai a puaa. Oka oka se maualalo ua oo i ai, sau mai le aiga taualoa, ma agai i se tulaga inosia toe matagā.
Ae faafetai ina ua salamō. Ua manatua e lē o i e tatau ona iai. E lei toe faatali. Poo fea lava o loo tatou iai, ia manatua, o le salamō, o le faitotoa lea e ui atu ai i le Atua. Poo le ā foi le matagā o agasala o loo fai, o le salamō lava le auala.
Aua le tautuua‘i, auā o tatou ola ua se mea e taatia fua i malae i le silafaga-ati a le Atua. O le uluai lauga a Ioane le Papatiso, o le salamō. Soifua.
(Toe faaauau)
