Ua matua lavea tonu loto o le ulugalii i upu a le la tama. Ua faafuasei ona tutu le ulugalii ma faataupupula le tasi i le isi, e aunoa ma se upu, ae ua toulu ifo loimata i o la mata. E ui lava e leai se isi o laua o gagana, ae ua taufai mautu lava i o la loto le mea o le a toe fai.
O lena lava afiafi, na savavali atu i ai le ulugalii, ona aapa tu lea o le tama o Ene ua uu mai le lima o si ona tama, ma toe taitai mai e faasaofai i le latou laulauai masani, a ua fusi mau atu e le fafine lana tama ma sogi i lona ulu, “faafetai lava son ua e aoao ia matua se lesona tele i o ma olaga.”
Ma e oo mai lava i toe taimi o le toeaina o Soi i lenei lalolagi, e lei toe tuulafoaia e Ene ma Tema, aemaise lo latou aai faatasi o se aiga.
E oo foi i le toulu soo o meaai ma sipuni a si toeaina, e lei toe avea lava ma mea mamafa i le mafaufau o le ulugalii.
E fia ni taimi tatou te soona mateletele ai i nai o tatou matua pe a amata ona le toe tutusa lo latou malosi e gaoioi ai, ma peiseai i o tatou manatu, ua avea i latou ma avega mamafa mai ia i tatou? Peitai o le tele o taimi, e tatou te lagona ai lava le faanoanoa ma le misia o i latou pe a oo ina faamavae mai lenei olaga.
Ona tatou toe nonofo lea ma mafaufau, ma ufitia i tatou i lagona o le salamo ma lagona nofosala, aemaise pe afai sa misi i la tatou vaai le suiga o le malosi ua latou iai, ma tatou le faafiafia ai ma faamalieina aso o totoe o lo latou soifuaga i lenei olaga. Sei aua lava nei o tatou tuulafoaia nai o tatou matua ua afu lo latou soifua, i o latou taimi o le vaivai.
O taimi sili na mo tatou. O taimi tonu na ua tatou maua ai le faamanuiaga o le toe faafoi atu o se faafetai mo le tausiga sa latou gasea ai ina ia tatou oo mai i nei tulaga ua tatou iai nei. O tatou manuia mautinoa na.
