Ona o le pauu soo foi o ipu ma taei i si toeaina, na iu ai foi ina aumai e le ulugalii se ipu laupapa e asu i ai meaai a si toeaina. Ua aai fiafia nei le aiga i le latou laulauai, ae ua vaaia lava foliga faanoanoa o si toeaina i taimi uma e tausami toatasi ai na o ia i si ona tulimanu.
O nisi taimi e vaaia ai le tutulu o fofoga o le toeaina, ae o loo faaauau pea le leoleoa ma le ote avaavau o le fafine o Tema i si toeaina, pe a masaasaa solo meaai i le foloa o le fale o le aiga.
O nei lava mea uma o loo tutupu, ae e tilotilo lava le tamaitiiti o Fiti e aunoa ma se leo. Ma i se tasi afiafi a o tapena ane e le fafine o Tema a latou meaai ma lona toalua ma le la tama i luga o le laulau ae ua faatulaga foi le meatausami a si toeaina i le fala i lona tulimanu, na tei le fafine i le savali atu lava o lana tama, uu uma mai lana ipu ma lana tui ma le naifi, ma ave faataatia it ala ane o le ipu a le toeaina.
Ua pupula faanonou atu mata o le fafine o Tema i lana tama. “Son, sau oe i le mea e masani ona e saofai ai.’ E leai ma se ano ane o le tamaititi, ae ua savali atu i tua i le potu o le toeaina ma taitai mai le lima, e agai mai i le la tulimanu ma saofafai uma ifo nei i lalo.
E oo foi i le tamaloa o Ene, ua tei i le vaaiga lea ua ia iloa atu i lona atalii. “Son, o fea e te ai ai?” na pau lava lea o le fesili a Ene i le tamaititi. “E sili ona ma saofafai maua ma Tamā i le fala, aua e toulu uma ma meaai.
Ae nonofo oulua i luga o le laulau, nei leaga le laulau a Mum ia maua ma Tamā.” Ua tei le tamaloa, ua le gagana, a o tilotilo mai i ai lona toalua, ma ua matua le gagana lava le fafine, ae o ona foliga e peiseai ua matua masiasi.
