O le tetete o lima o si toeaina, e tele ai ina pau lana sipuni i lalo o le laulau, pe masaa solo se meaai e taumafai e tausami. Afai foi e tau sii ae se ipu susu poo se vaiinu, e tele lava ina see le ipu ma toe masaa uma ma susu ai le ie o le laulau pe susu foi le foloa.
Ua amata ona tomumu le fafine o Tema i lona toalua, o le a ‘uma le fale ona leaga solo i mea nei e toulu ma masaa i le toeaina.’ Sa taumafai lava Ene e faamalie lona toalua ma faamanatu i ai, e alofa ma taumafai e malamalama i le tulaga mai ua iai si ona tama.
Peitai, ai ona ua faalogo pea lava pea le tama i iuleo faasea a lona toalua, na iu ai lava ina au faatasi le tama ma lona toalua, ma ua amata foi ona solomua i le tama o Ene, le soona leoleoa i totonu o le fale, aemaise lava pe a manava mai ae faailoa atu foi i ai e le fafine se mea na faaletonu i si toeaina i lena aso.
Na faapea atu nei le fafine i lona toalua: “Ua tatau ona fai sau fuafuaga i lou tama. O le a uma au mea taugata ona taei. E fai o le saati solo ma paepae mea i luga o le foloa, ae ua tiga taliga ma tau le oso ai se fia ai o se isi, i le pao o le ai a lenei toeaina.”
Ua fenuminumiai le mafaufau o le tama o Ene, e na te lagona le alofa i le sai mai a lona toalua, aemaise o le fafine e toaga tele e teuteu lona fale.
Ae i le isi foi itu, e mafaufau le tama i lona alofa i lona tama, aua ua toe lava o ia o le latou fanau lea o loo mafai ona nofo ai si toeaina, sei vagana si ona uso lea na iai muamua le toeaina, ae o isi uma tama ma teine ua mamao atunuu o loo nonofo ai ma o latou aiga.
Talofa e, ua moni lava le isi agana ua tatou masani ai, poo le a lava se alofa i matua, ae ua sili lava le toalua. Aua ua ioe nei Ene i le manaoga o le fafine ma fai ai loa le faaiuga, o le a sili ai ona fofola se fala i le isi tulimanu o le fale, e faasaofai lelei ai si toeaina ma fai lana meatausami.
