Ua atoa le tausaga talu ona maliu le tinā o si tamaloa o Ene, ma o loo nofo pea lo latou tamā i le fale o le isi ona uso ma lona toalua. Sa mafaufau Ene, ua tatau foi ona fai se laua galuega ma lona toalua i le tausiga o si ona tama, ae sei fai se koma a si ona uso o Fiti ma lona ia toalua.
Peitai o le atugaluega tele o le tamaloa o Ene, o lona toalua le fafine o Tema, aua e iai lava uiga fia inoino ma le fia vaai maulalo o le fafine aemaise lava i aiga o si tamaloa o Ene, aua e tau le taualoa tele i le vaaiga lava ia faaletagata.
Peitai na iu lava ina lototele Ene ma aumai i luga le mataupu i lona toalua. Sa tau fai lava sina umi o fefaloai le mataupu, ae na iu ina lolo le fafine, peitai e tuu atu i ai ma aiaiga e tatau ona fai. Na tapena mai si toeaina o Soi, ma na iloa lava e Ene le fosi o foliga ataata o lona toalua, ai ona o lea faatoa sau si toeaina.
O le ulugalii o Ene ma Tema, e toatasi lava le la tama laitiiti, le tamaitiiti o Fiti, ma o le ola foi lea o le aiga i aso uma, aua e tuai lava ona pisapisao le fale o le aiga, ona o le lei ala o le tamaitiiti.
E tele ma matagofie le fale o le ulugalii, ma e tele foi mea taugata a le fafine o loo teuteu ai totonu o lona fale, atonu o le ala foi lea o le musu e soona aumai se tagata o le aiga o si tamaloa mai tua, aua o le fafine e le sepu se mea i totonu o le fale, pei lava e toafia ni tagata o loo faigaluega ai.
O si toeaina o Soi, ua tele lava faafitauli ua aafia ai lona soifua maloloina. E fai o le tetete o lima ma faigata ai ona uumau se mea, ae o ona fofoga foi ua puaoa ai lana vaai ma o le tele o taimi e tau sulu ai lava pe a savalivali solo. O le faigata foi lea o ona lima ma mata, ua avea ma itu e le faigofie ai ona tausami lelei.
