O le taimi muamua lenei ua faia ai se Eucemenical Service, poo le sauniga lotu tuufaatasi, a o lei amataina se taaloga a le Manu Samoa i totonu lava o Sydney. Na faia lenei sauniga i le Cathy Freeman Park, lea e sosoo ma le ANZ Stadium, i le sefulu i le taeao, ae o le lua i le aoauli amata le taaloga faavaomalo, a le Manu Samoa ma le Wallabies.
E toafā le aufaigaluega paia a le Atua na auai. Sa taitaiina le sauniga e le afioga Patele Tietie, Chaplain mo Katoliko Samoa i Sini, Patele Alatini Kolofoou, Chaplain mo Katoliko Toga, Patele Paulino ma Rev Qele Ratu (Fiti), mai le Family Worship Centre, Kingsgrove.
Sa matagofie le sauniga, ona o lea sa lagolagosua nai o tatou uso mai Toga ma Fiti, i le tapuaiga a le atunuu mo le Manu Samoa. O le aufaipese siufofoga mālie a le Matagaluega Katoliko Sini na peseina le sauniga, e ui ina e na o se selau le mamalu lasilasi o le atunuu i lea taimi, ae o le fiafiaga sili ua mua i malae ni talosaga mo le taaloga, aemaise foi mo ‘au a Toga ma Fiti, i le sauni atu i le World Cup.
O le alii ta‘uta‘ua i le lakapi, o Nick Farr-Jones, na malo faaaloalogia ai. Na o le Samoa Times na maua le pasi poo le media accreditation i le ANZ Stadium, ma le ova atu i le fasefulu aufaasalalau a Ausetalia. Sa matuā lilo atoa le malae i ofu sasama o le tapuaiga a le Wallabies, ae na faaputuputu faatasi le autapuai a le Manu Samoa ma peseina ni faamalosiau mo le ‘au, a o lei faia le siva tau.
Se mea ina a lelei, o le maopoopo o le tapuaiga, lea na matuā laulogo ai le ANZ Stadium, i le pepese o le aumaimoa, “se faamalosi Manu Samoa”. Lea la na tua lelei ai le manumalo o le ‘au, ona o le tapuaiga a le atunuu i Sydney, ma tulimanu e fā o le kelope.
