Ua faaalia e le tamaitai pule o le Aoga o le Kolisi o Leifiifi lea e tuuaia ana tama aoga i le faamisa i le taulaga, ua mae‘a le galuega a le aoga ma o le taumafai e faasa‘osa‘o tama aoga i le taimi ua tuua le aoga, e lē o se matafaioi lena a le aoga.
O lea saunoaga na tali ai tuuaiga a le Kolisi o Sagato Iosefo o le misa na tulai mai ma vevesi ai le taulaga i le Aso Tofi na mavae atu nei na mafua mai i tama aoga o Leifiifi.
O le lua vaiaso talu ai na tulai mai ai feeseeseaiga i le va o le Kolisi a Avele ma Sagato Iosefo ae uma ane feeseeseaiga, ae tulai mai ai loa i le Aso Tofi vevesi i le va o tama Leifiifi ma tama Sagato Iosefo.
O le faamatalaga a Malaea Lauano le tamaitai pule o Leifiifi, e lē o mapu le faia o fono ma tama aoga ma lapatai ai i le fufusu i le taulaga.
Na ia ta‘ua e tasi lava le tali a le aoga i le tama aoga e faamaonia ua faavevesi o le tuli ma o le tama e toatasi lea ua ave e Sagato Iosefo i le amataga o fusuaga i le Aso Tofi o lea ua tuu atu e agai i le Faamasinoga e tali i ia moliaga. O le tele lava o fusuaga e mafua mai i taaloga ma ua loma foi taimi o afeleti ae o lakapi ia e tele ina tulai mai ai feeseeseaiga i le va o tama aoga.
O lea foi la ua mātau lelei le tulaga e iai taamilosaga o lakapi a aoga ona o le taumafai o leoleo e taofi le tulai soo mai o misa i le va o aoga.
Peitai e manino e lē na o aoga o loo tulai mai ai ia feeseeseaiga. Na faamautu mai se vevesi na molimauina ai ni fusuaga i le va o nisi o taulelea o le afioaga o Salelavalu ma le afioaga o Salelologa.
Na mafua ona tulai mai nei feeseeseaiga ona o lakapi foi ma na iai se faalavelave na manu lava e tulai mai pe ana le vave atu se matai o le afioaga o Salelologa.
O tamaiti ua tamomo’e ane ma agaese i se pasi na iloa e ia alii o loo malaga atu ai tama o le nuu tuaoi o Salelavalu ma na vave ona tu le matai Salelologa lea i le auala o le pasi ma tutuli ese tama nei mai i le ono faatupu o se faalavelave tele.
O le faaaliga a le Komesina o Leoleo Lilomaiava Fou Taioalo, o loo tulai i le vaiaso lenei alii aoga ia na tuuaia i le faatupu vevesi i le taulaga ma tafasi ai tama o aoga e lua ma ua leai foi ma se taimi o leoleo e toe iloilo ai mataupu ua tulai soo mai, o le faamaonia lava o le tamaititi e faatupu vevesi o le a logo loa le aoga mo le faia iai o faaiuga talafeagai.
O vevesi nei na tulai mai ai ni tau‘aiga maa i le lua tausaga talu ai ma faaleaga ai taavale atoa ai ma nisi o faleoloa ma ofisa i le taulaga. Na taofia ai e le Malo mai i le faatinoga o nisi potopotoga tau taaloga ma taofia ai ma le taamilosaga o lakapi a aoga.
E tele lava tagata e tuuaia i lenei faafitauli e pei foi ona agai isi faitioga i faiaoga, o tama tuai o Kolisi ma tama aoga lava. Ae e pei ona faaalia e le tamaitai pule o le Kolisi o Leifiifi e toe foi lava i mātua ma le a‘oa‘oga o fanau.
“E faigata tele ona taumafai amioga a fanau i lenei vaitaimi ma e alu alu lava aoaiga a faiaoga gata ae afai e lē faalogo i mātua i o latou aiga faafefea la ona faalogo i faiaoga?” o se saunoaga lea a le tamaitai pule.
“Na omai Leoleo, na faia foi mafutaga a faiaoga ma tama aoga e lapatai ai i le ono toe tulai mai o vevesi, ae o le taimi lava e agai ai i nofoaga faitele o le taimi la lena e lē o toe iai se aiā a faiaoga i lea taimi ma ua tuu i leoleo le vaaiga o ni vevesi e ono tulai mai”.
Sa fono pule aoga i le faaiuga o le vaiaso ma na toe talanoaina ai foi lenei lava faafitauli ua avea ma faatigaulu tele i le lautele o le atunuu.