O le afioga Sala Emelio Fue i le ogatotonu ma sui o le aulotu Katoliko i Leoloto i Leauvaa uta le susuga Taua Petelo i le itu agavale o le Taitaifono ma le afioga Tuala Talitiga Ioane o le Failautusi

O le afioga Sala Emelio Fue i le ogatotonu ma sui o le aulotu Katoliko i Leoloto i Leauvaa uta le susuga Taua Petelo i le itu agavale o le Taitaifono ma le afioga Tuala Talitiga Ioane o le Failautusi

Na sii ma’i i Samoa i le masina o Me 2018 le afioga Sala Emelio Fue ona o gasegase o le tino ae na toe foi i Niu Sila o loo faamautu ai ma lona aiga, ona ua siliga fofo ma togafitiga a foma’i i Samoa. Na faamatala le afioga Sala ai o lana siiga ma’i lea ua toe musumusuina ai o ia e agaga o ona tuaa ua maliliu e alofa i le talosaga a le aulotu i Leloto sa faavae e nisi o tamā ma tina e aofia ai le tuaa poo le tina o Sala Emelio Fue. “O la’u siigama’i na toe faavave i Niu Sila ma saili fofo ai lea na maua ai le taulasea ma ua toe maua ai lo’u malosi atoatoa”.

E lei galo i le afioga i le Sa’o Fetalai le savali a le Taitaifono ma le komiti a le aulotu mo se fesoasoani i le galuega o le toe faaleleia o le Malumalu auā tapuaiga masani.

“O lea la ua ou toe malaga mai i lenei masina ma ou faailoa ai loa i le aulotu e fia maua se matou feiloaiga e fia faataunuu se fesoasoani e tusa o le sāvali ia te au.

E sefuluafe le tinoitupe na foai e Sala i le aulotu e faatau ai le maamora fola fale poo le tiles mo le Malumalu.  “Ou te lei talitonu o le a talia e le afioga i le Sa’o Fetalai le matou sāvali, ae na faate’ia ina ua logo atu o lea ua taunuu i lona aiga ma e fia feiloai mai mo le aumai o lana fesoasoani”. O le saunoaga lea a le Taitaifono le susuga Taua Petelo, ona sa ia faapea ailoga a tau se faatatau a le afioga Sala ma lona aiga i se seleni tele faapea. “E lē o se fia iloa o se tagata pe o le fia mautupe, ae e te silafia o a’u o le Isaraelu moni pe ou te nofo mai fafo e lē mafai ona tuua o’u tiute faamatai o le nuu ma le aiga faapea le lotu, o le mafuaaga lena e tusa o lau fesili na ou faamaopoopo ai si a’u fanau ma lo’u aiga ma maua le seleni ua tuu atu mo le galuega o le Malumalu”.

O le feiloaiga a Sala ma le aulotu i le tuuina atu o lana meaalofa tupe na toe teuteu ai ia mafolafola nisi o futia ua tea i se isi foai a Sala ma lona aiga e sefulu afe foi na ave mo le Malumalu ma le galuega a le Atua, ae na iai se nunumi ona o nisi sa tau iai le foai. “Ua uma ona toe faalaulelei lena tulaga ma ua silafia ai e le aulotu sa lē nofonofo foi a’u nei ma le fanau aemaise si o’u aiga i lena fesoasoani”.