O le mae‘a o le palota tele ia Mati o le tausaga nei ma filifilia le Palemene fou, na faailoa ai e le Fofoga Fetalai filifilia se galuega o le a toe faafou ai le maota fono, faapea ma le sioina atoa o le lotoā o iai le maota o le Palemene e aofia ai ma le malae i Tiafau i se pa.
O le faamoemoe o le Fofoga Fetalai ua tatau ona malu lelei le maota o loo tapuvae tasi i ai pulega o le Malo o Samoa, ma ia puipuia malu lelei meatotino a le atunuu.
O le galuega o le pa na amata mai i le lotoā o le maota o Tofilau Eti Alesana ma faasolo atu ai le faatutūina o paipa i le malae o le faautugatagi a Samoa o Tiafau. Peitai ua alu alu le galuega ae ua toe aveese uamea o le pa mo le malae o Tiafau.
Na sailia e le tusitala le mafuaaga, ma faaalia ai e se molimau faatuatuaina o se faipule o le fono aoao ua taofia le tosoina o le pa i Tiafau.
“Ua faia i ai se faaiuga a le Malo e sili ona taofi, ae tau o le lotoā o le maota o sui faipule e sio i le pa”. O le faamatalaga lea a le molimau.
E lei maua se avanoa e fesiligia ai le Fofoga Fetalai, ae na faaalia e le faipule o le Palemene o le mae‘a ona faia o le faaiuga a le kapeneta i le mataupu, na logoina ai le failautusi a le Fofoga Fetalai a o toesea le fofoga o le fono i se Malaga i le atunuu o Saina.
E lē o toe po se lilo i le silafia o le toatele i le alia‘e o ni lagona lē fiafia ma finagalo o nisi ua lagomia ona o le tosoina o le pa i le malae o Tiafau.
O nisi fai mai o se vaaiga o le a toe oo mai ai aga o pulega faakolone ua leva tausaga talu ona lē toe faatinoina i Samoa.
O nisi ua faaseā i le foliga o se pa e fausia o se pa pupuni e tutuli ese ai le atunuu mai le uia o le malae sa saili ai Malo.
O le atugaluga foi lea o le sui faipule o Aleipata Itupa i Lalo i lana saunoaga faalauaitele i le tala autū o le Tupe sa talanoaina e le Palemene i le masina o Iuni.
Na saunoa le faipule le afioga i le Tuiatua Faanofonofo, e lē matagofie se vaaiga faapea ona o lana mātau, ua tele tausaga ua mavae sa saoloto le atunuu e afea Tiafau, ae fau ai loa se pa ona pei lea o le a tutuli ese ai tagata mai le eleele e faasino i soo se tagata Samoa o loo iai ma le Palemene.
