O le a silasila le atunuu i se maketi o le a na o fua lava o faatoaga e faatau ai, pe a mae‘a le maketi fou ua fausia i le nofoaga sa iai le maketi i Fugalei ua tala i lalo ma aveese. O le fausaga o lea maketi e tasi le fogafale ae faataalaelae sona vaega tele e faaaogā e le au faifaatoaga.
O le finagalo o le alii palemia i se feiloaiga ma tusitala o se fausaga lea o le a malu uma ai faifaatoaga e leai se isi e toe faalā pe faatimu ma faatau ana fua tau faatoaga.
O auala i le maketi fou na saunoa le Palemia o le a faataamilo le auala valita, e faafeagai ma auala valita i Sisifo ma Sasa‘e o le nofoaga ma o le a sili ai ona faafaigofie faatauga a le atunuu. E sefulu miliona le tau o le galuega ma o le suiga o le maketi mai le ata na tusia muamua e lua fogafale, o le a na o le tasi le fogafale.
O atugaluga ia o le Itu agai e pei ona saunoa le taitai le afioga Palusalue Faapo II. “E tele lenei seleni o le a faaalu ae o le a e na o le tasi le fogafale. E tatau i le Malo ona toe fetuunai lana faautautaga e fau ma ni faaleoloa ma ni nofoga mo pisinisi laiti”.
O le tuualalo a Palusalue e mafua i le suiga o lea galuega o le a tasi le fogafale toe na o fua o faatoaga e faatau i le maketi fou, leai ni faleoloa ma ni pisinisi laiti e toe iai. O atugaluga foi ia o le taitai o le Itu agai, ona o loo nofo tatali pisinisi laiti sa lisi i le maketi tuai ua tala.
O tuugatala sa fai ma le Malo a o lei talaina le maketi e toe o atu uma i ai, peitai o lea ua faailoa e le faalapotopotoga o taui o faalavelave faafuasei o latou e umia le maketi, e lē toe iai ni pisinisi laiti.
O loo tele matega atonu ua silasila le Malo e tau o fua o faatoaga e faaaogā i ai le maketi fou i Fugalei, ona o lea ua iai le isi maketi tuma‘oti e pei ona fausia e le kamupani a Amau. O le taimi nei e leai ma nisi e toatele o faaaogāina, e oo foi i poloka laiti mo le au faifaatoaga ma pisinisi laiti e lē o faaaogāina.
Afai e faaauau pea faleoloa ma pisinisi laiti i le maketi i Fugalei o le a lē maua nisi e faaaogāina lea maketi tuma‘oti. Palasi atu i le maketi i Vaitele o loo gaogao ii ma leai nisi e toatele o faaaogāina, ona tulai mai lea o le fesili poo ai nisi a faaaogāina ia maketi e lua, pe afai e fau le maketi i Fugalei i lona fausaga sa iai muamua.
Na fesiligia nisi o le aufaipisinisi laiti sa faaaogāina muamua le maketi i Fugalei. O le latou tala mai, o se faaiuga lē manuia ua faia e le Malo ona o le a faatalitali pea, peitai ua ese le ata tifaga ua matamata nei i ai.